Forcat ruse kanë goditur infrastrukturat kritike në qytetin Kharkiv në Ukrainën Lindore, gjatë sulmeve të kësaj të enjte.
“Shpërthime në Kharkiv. Armiku po synon objektet e infrastrukturës. I kërkoj të gjithëve që të jenë më të kujdesshëm dhe të qëndrojnë në strehimore nëse është e mundur”, tha kryetari Ihor Terekhov.
Një zyrtar i lartë ukrainas, gjenerali Oleksii Gromov, tha se Rusia po përgatitet për një luftë të gjatë në Ukrainë dhe ende dëshiron të pushtojë të gjithë vendin.
Në një konferencë për mediat, ai u shpreh se Moska mund të nisë një sulm nga Bjellorusia dhe se Rusia po trajnon trupa të reja në territorin e fqinjit të saj dhe ka zhvendosur avionët ushtarakë atje.
Zëvendësministrja e Mbrojtjes, Hanna Maliar, paralajmëroi në të njëjtën konferencë, se nuk duhet të ketë relaksim pas tërheqjeve të fundit ushtarake ruse.
“Kremlini kërkon ta kthejë konfliktin në një konfrontim të zgjatur të armatosur. Ne dhe bota nuk duhet të relaksohemi, sepse qëllimi përfundimtar i Federatës Ruse është të pushtojë të gjithë Ukrainën dhe më pas mund të shkojë më tej“, tha Gromov.
Kremlini nuk i ka sqaruar kurrë plotësisht qëllimet e pushtimit të Ukrainës, të nisur më 24 shkurt, për të cilin tha se ishte pjesërisht për të mbrojtur rusishtfolësit në Ukrainën lindore.
Rusia deklaroi javën e kaluar se ende siguron të paktën shumicën e pjesëve të Ukrainës lindore dhe jugore që i ka deklaruar si të sajat, por duket se po braktis kontrollin e saj në zona të tjera në perëndim dhe verilindje që Ukraina ka rimarrë.
