Kryetari i Bashkimit Demokratik për Integrim, Ali Ahmeti përmes një video që po qarkullon nëpër rrjetet sociale i është përgjigjur “Grupit të Zjarrit”. Ahmeti shihet me një duhan në dorë shumë i relaksuar duke kënduar këngën “T’hupi roja (rrënja), të hupi fara, tuk o qe i dole Keqës përpara”.
Mexhiti më herët, gjatë një takimi me qytetarët në Studeniçan, porositi Ali Ahmetin në emër të “Grupit të Zjarrit” që “të mos djegë të gjithë jorganin për një plesht”, një metaforë e përdorur për kërkesën e tij për zëvendësimin e ministrave aktual të BDI, për shkak të dështimeve dhe sepse i plotësojnë kushtet për t’u larguar. Mexhiti theksoi mbështetje për Ali Ahmetin, por shprehu dhe zhgënjimin që nuk adresohen shqetësimet e një grupi jo të vogël njerëzish, shumica anëtarë të kryesisë së partisë shqiptare.
Pas videos së publikuar në rrjetet sociale ku shihet kryetari i BDI-së, Ali Ahmeti duke kënduar, ka reaguar nënkryetari i partisë Izet Mexhiti.
“Të inçizosh Ali Ahmetin duke kënduar dhe pastaj ta publikosh të njejtin inçizim, për të defokusuar opinionin prej problemit të vërtetë, është keqpërdorim i paturpshem i figurës së tij… Të inçizosh Ali Ahmetin dhe të ruash këto video për t’i shfrytezuar kur të konvenon ty është jokorrekte dhe duket se nuk është hera e parë që po ndodh. BDI patjetër duhet të çlirohet nga uzurpatorët, mercenarët dhe të paaftit!”, ka shkruar Mexhiti.
