Dosja e 21 janarit 2011 që përfundoi me katër të vrarë dhe dhjetëra të plagosur, mund të marrë tjetër rrjedhë. Pas publikimit të urdhrave të dhëna në radiot marrëse-dhënëse, ku dallohet ish-Komandanti i Gardës së Republikës Ndrea Prendi për të qëlluar mbi protestuesit që kalojnë gardhin e kryeministrisë, PS ka kërkuar nga prokuroria speciale që me faktet e reja çështja të merret në një hetim të ri.
Pas 12 vjetësh 21 Janari merr një tjetër rrjedhë të paktën në kuadrin e deklaratave, pasi i ngelet institucioneve ligjzbatuese të marrin në konsideratë provën e re për zërin që urdhëron vrasjen e katër protestuesve në bulevardin “Dëshmorët e Kombit”. Pas 12 viteve kjo është një ngjarje me fajtorë të pandëshkuar, sidomos për familjen e Aleks Nikës. Kjo çështje pritet që të merret SPAK, pasi vetëm ky institucion mund të hetojë figura të larta politike. Në audion e publikuar për herë të parë nga gazetari Artan Hoxha, dëgjohet ish-kreu i gardës Ndrea Prendi që u kërkon vatrtësive të tij të qëllojnë me plumba në trup protestuesit që kalojnë karrdhin rrethues të kryeministrisë. Nga ajo ngjarje mbëteën të vrarë Ziver Veizi, Hekuran Deda, Faik Myrta dhe Aleks Nika. Që të katër viktimat u eleminuan larg kryeministrisë teksa ndodheshin në bulevard dhe nuk përbënin asnjë rrezik për personat që ndodheshin brenda kryeministrisë. Gjithashtu po në këtë pjesë të komunikimit të zbuluar ditët e fundit kërkohet që në radio të paraqitet një nga drejtuesit e gardës pasi ishte ministri (Lulzim Basha) që donte të fliste. Kjo audio konsiderohet nga Partia Socialiste si një provë e re dhe një mundësi që SPAK të rihapë çështjen dhe vendosë para përgjegjësisë autorët e asaj ngjarje të rëndë. Për atë krim janë dënuar vetëm Agim Llupo me vetëm tre vite burgim dhe Ndrea Prendi me një vit. Kreu i grupit parlamentar socialist, Taulant Balla, deklaroi në një dalje para mediave këtë të dielë se “prova e re audio që ka dalë provon se komandanti i Gardës ka urdhëruar vrasjet e 21 Janarit” dhe shtoi se kjo gjë mjafton që “dosja të transferohet në Prokurorinë e Posaçme kundër Korrupsionit dhe Krimit të Organizuar”. “Kurrë nuk kemi marrë asnjë përgjigje si palë akuzuese apo e dëmtuar për 21 Janarin. Dosja penale për 3 nga 4 vrasjet dhe vendimet e gjykatave janë një nga turpet më të mëdha në atë që quhej drejtësi në këtë vend, deri pak vite më parë. Edhe pse u vërtetua se bereta e Gardës së Republikës ka qëlluar, vrasja e Faik Myrtajt u konsiderua pa autor. Duke qenë forcë qeverisëse, jemi përpjekur të ruajmë kufirin e pavarësisë së pushteteve, edhe pse me pushtetin gjyqësor në këtë vend janë bërë shpërdorime ulëritëse të detyrës. Jemi në anën e drejtësisë dhe presim drejtësi”, nisi Balla fjalën e tij. Dosja e Alex Nikës është kërkuar nga Partia Socialiste që të hetohet nga SPAK. “Kemi kërkuar kalimin e dosjes së Aleks Nikës në SPAK. Prova e re audio që ka dalë provon se komandanti i Gardës ka urdhëruar vrasjet dhe ka zgjedhur ata që duhet të qëllonin. Fakti që Berisha zhduku serverin e kamerave të Kryeministrisë, nuk e fshehu dot krimin. Pas 12 vitesh, më në fund, ka dalë në publik prova më e re dhe më e rëndë. Për këto më sipër, kjo dosje nuk duhet të mbahet më peng në Prokurorinë e Tiranës, duhet që kjo dosje të transferohet në Prokurorinë e Posaçme kundër Korrupsionit dhe Krimit të Organizuar”, shtoi Balla.
Ulsi Manja
Ndërsa ministri i Drejtësisë Ulsi Manja, më 21 Janar në një konferencë për mediat, i ka bërë thirrje “drejtësisë së re që të bëjë detyrën në përputhje me Kushtetutën dhe ligjin për dosjen e 21 janarit”. Ministri Manja ka kërkuar nga SPAK-u që me daljen e disa regjistrimeve të reja nga komunikimi i ish-komandantit të Gardës, Ndrea Prendi me vartësit mes tyre Alfred Ahmetcenajt, ish-komandant i njësisë speciale të Gardës së Republikës, të nisë menjëherë hetimet. Ndërsa theksoi se këto regjistrime vërtetojnë edhe një herë se “21 janari” është krim shtetëror, Manja theksoi se e ka për detyrë si ministër i Drejtësisë por edhe si qytetar që të ngrejë zërin deri në vendosjen e drejtësisë. “Janë vrarë në demokraci duke protestuar si qytetarë të lirë nga pushkët e pushtetit të kohës në dyert e kësaj ministrie. Sot 12 vjet pas këtij krimi të shëmtuar shtetëror përpos deklarimeve të ish-kryeministrit Berisha, që vijon të thotë me zë dhe figurë se ata i vrau shteti, nga mbrëmë në darkë ka një provë të re materiale që mbështet deklarimet e ish-ministrit”, tha ministri i Drejtësisë. Manja u tregua kritik ndaj institucioneve të drejtësisë së re duke i akuzuar për “apati dhe mungesë të vetëdijes qytetare” për misionin që u është ngarkuar nga Kushtetuta dhe ligji.
Reagimi kundër
Mark Nika, xhaxhai i Aleks Nikës, i vrarë në 21 janar, tha se krerët e Gardës kanë marrë urdhër nga Berisha e Basha për veprimet në 21 janar. Nika u shpreh se Berisha jo vetëm e mbrojti, por madje e shpërbleu gardën. Faj sipas tij, ka edhe PS që bëri kryetar bashkie një nga gardistët e grupit të zjarrit në 21 janar. “Le të thoshin Aleksin e vramë se bëri këtë faj, po vrasin dhe fshihen. Berisha e mbrojti gardën dhe e shpërbleu madje. Këtu gaboi edhe PS, se një nga gardistët e bëri kryetar bashkie. Nuk duhet t’i kishin bërë ato dhe ato duhet t’i korrigjojë vetë PS lëshimet që ka bërë duke shtruar rrugën që gardistët dhe vetë policia, që i ka fshirë provat, dhe sot janë ngritur në përgjegjësi”, tha Nika.
