Një operacion blic është zhvilluar në Tirol të Austrisë ku në pranga janë vënë 13 persona mes të cilëve 4 shqiptarë. Mediat vendase raportojnë se të akuzuarit janë meshkuj nga mosha 19 deri në 50 vjeç. Mes tyre shqiptarë, austriakë, turq, italianë si dhe serbë, boshnjakë dhe kosovarë. Ata kanë importuar deri në 32 kilogramë kokainë dhe deri në 100 kilogramë marijuanë në territorin federal të Austrisë.
Grupi kriminal, i cili është përgjegjës për trafikun e paligjshëm të drogave në rrethin Kufstein dhe rrethinë punonte në mënyrë shumë të strukturuar. Disa anëtarë kujdeseshin për importin e drogës, ndërsa të tjerët punonin si shitës. Mbi të gjitha, u përzgjodhën njerëz që ishin vetë të varur për të shlyer çdo borxh duke shitur drogë. Një i dyshuar kryesor mësohet se ka kërcënuar edhe debitorët dhe familjet e tyre për t’i detyruar ata të bashkëpunojnë.
Përveç kësaj, tre vjedhje në ndërtesa banimi në ultësirën e Tirolit mësohet se janë nisur nga grupi. Vjedhjet kanë rezultuar në dëme totale prej të paktën 50 mijë eurosh, si dhe janë vjedhur shuma të mëdha parash, armë, ar dhe stoli. 12 nga 13 të arrestuarit i është caktuar masa e paraburgimit, njëri është shpallur në arrati dhe tre të dyshuar të tjerë janë në kërkim. Tashmë janë identifikuar dhe raportuar 20 blerës. Hetimet janë në vazhdim.
