Një nga debatet aktualke është regjistrimi i Partisë Demokratike në zgjedhjet lokale të 14 majit, pasi ende nuk është dhënë vendimi për vulën.
Lidhur me këtë çështje ka folur pasditen e sotme Ilirjan Celibashi, kreu i Komisionit Qendror të Zgjedhjeve.
Celibashi tha në një dalje mediatike se PD është një e vetme, por diskutimi është vetëm për kreun.
“Ka vetëm një PD, diskutimi është për kreun. Regjistrimi i PD do të bëhet kur të kemi gati kërkesën. 6 marsi afati i fundit që PD të regjistrohet në KQZ”, u shpreh ai.
I pyetur se përse KQZ nuk merr parasysh vendimin e gjyqtarit Agron Zhukri që njohu Kuvendin 11 dhjetorit, Celibashi tha se do të presë sa të merret një vendim për vulën dhe PD t’i drejtohet me kërkesë për regjistrimin në zgjedhje.
“Është e njejta përgjigje nga ana ime në lidhje me këtë çështje. Të presim ditën kur të kemi përpara një kërkesë nga PD. Në dijeninë e KQZ-së ka vetëm një PD. Dhe nuk mund të ketë dy parti politike të regjistruara si subjekt zgjedhor apo me emra të ngjashëm. Nuk ka kërkesë të Rithemelimit, të grupeve. Ka kërkesë të PD-së për tu regjistruar si subjekt zgjedhor”, theksoi kreu i KQZ-së.
