Kryetari i larguar i Kadastrës, Artan Lame ka mbajtur sot një fjalim në prezantimin e drejtoreshës së re Dallandayshe Bici.
Teksa foli për punën në të gjithë këto vite, Lame nuk i ka kursyer lëvdatat dhe për kryeministrin Edi Rama.
Ai tha se nuk e ka vuajtur ndërhyrjen e kreut të qeverisë në vendimmarrjet e tij.
“Nuk e kam vuajtur ndërhyrjen e Kryeministrit në vendimmarrjet e mia. Për këtë e falenderoj sinqerisht, sepse bëhet fjalë për një institucion që jetë e mot ka qenë purtekë në erë, që përkulej ose nga frynte paraja, ose nga frynte pushteti”, tha Lame.
Sipas tij, Kadastra nuk përbën më lajm, sepse institucioni është vënë në binarët e punës së zakonshme.
“Kadastra nuk përbën më lajm, sepse tashmë Institucioni është vënë në binarët e punës së zakonshme, i ka përfunduar reformat e mëdha.
Cc’do punonjës i Kadastrës, duhet të ndjejë prapa qafës frymën e Drejtorit, por edhe sytë e Kryeministrit.
Reforma e pronës nuk do të ishte ndërmarrë kurrë pa Edi Ramën. Askush tjetër nuk do t’i kishte hyrë një qederi të tillë, përveçse një njeri si ai”, shtoi ai.
Ndëra nuk i ka kursyer dhe disa këshilla për ish vartësit e tij.
“Shërbejuni njerëzve, sepse ky institucion ekziston pikërisht për këtë gjë, për të shërbyer. Kur nuk përton Kryeministri të më nisë mua ankesën e çdo qytetari, merreni me mend se sa shërbim dhe impenjim pritet nga secili prej jush!
Kryeministri m’i çonte ankesat e qytetarëve, ndonjëherë të shoqëruara edhe me fjalët e veta: “Lameeee, i çmendët njerëzit”!”, ka përfunduar Lame.
