Bardha, një nga fqinjet e Mimoza Pajës, 58-vjeçares që u vra një natë më parë në lokalin e Fatjon Muratit, ku dhe punonte si banakiere, ka treguar bisedën me mbesën e viktimës, që u plagos në të njëjtën ngjarje. Në një rrëfim për mediat, Bardha thotë se 10-vjeçarja i ka shkuar në shtëpi duke qarë dhe i ka treguar se e kishin vrarë. Më pas, gruaja thotë se të miturën e ka marrë ambulanca. Fqinja shton se ndihet e pasigurtë në vendin ku jeton, për shkak të ngjarjeve të shumta kriminale që janë shtuar.
“Jetonte në kushte të vështira ekonomike, i kishte vdekur burri para 2 vitesh. Unë isha brenda, djali po flinte, u çua djali i trembur, ka ndodhur një vrasje. Kur dola jashtë, thanë “kshtu kshu”, u vra Moza, armë me breshëri, kur dola dëgjova këto gjëra. Jemi aq të frikësuar sa kemi frikë të jetojmë të shtëpia, në punë tënde, këtu është bërë jetë e frikshme. Ambulanca erdhi shpejt. Erdhi 10 vjeçarja, më tha mua “o teta Bardha më kanë vrarë”, po qante me të madhe, ishte duke qarë, erdhi ambulanca dhe e mori. Ka disa kohë që po punonte”, tregon fqinja.
Masakra ndodhi një natë më parë në Don Bosko. Dy persona qëlluan me breshëri plumbash në drejtim të lokalit të Fatjon Muratit duke lënë të vdekur banakieren Mimoza Paja, 60 vjeçe dhe pesë të tjerë të plagosur, mes tyre dhe një vajzë 10-vjeçare që u dëmtua nga xhamat e thyer. Të plagosurit e tjerë janë Sahit Murati (xhaxhai i Fatjon Muratit), Astrit Meraj, Emanuel Sala, Ermir Bejuku, Genc Shohalli, të gjithë jashtë rrezikut për jetën. Murati vetë ndodhej jashtë Shqipërisë në momentin që u krye atentati. Ai është i njohur në botën e krimit dhe si miku i ngushtë i Endrit Dokles, madje është marrë në pyetje për masakrën e Fushë Krujës, ku mbeti i vrarë Brilant Martinaj me dy miqtë e tij.
