Atentati i një nate më parë në zonën e “Don Boskos”, ka shkaktuar një viktimë dhe 6 të plagosur, mes tyre edhe një e mitur.
Në një intervistë për Euronews Albania ka folur babai i E.S, një prej të plagosurve në lokalin në pronësi të Fatjon Muratit .
Ai tha se i biri ka qenë duke pirë kafe në momentin që ka ndodhur ngjarja ndërsa tha se ka marrë dy plumba. Më tej ai theksoi se i biri është jashtë rrezikut për jetën dhe ndodhet në gjendje të mirë shëndetësore.
Për hetimin e kësaj ngjarjeje është ngritur një grup i posaçëm hetimor dhe nën drejtimin e Prokurorisë vijon puna intensive për zbardhjen e rrethanave të ngjarjes, sekuestrimin e provave që do të shërbejnë për zbardhjen e ngjarjes, identifikimin dhe kapjen e autorëve.
