Edhe pse takimet dypalëshe të kryeministrit të Kosovës, Albin Kurti dhe të presidentit të Serbisë, Aleksandar Vuçiç me zyrtarët evropianë ka kohë që kanë përfunduar, takimi i përbashkët i tyre nuk ka nisur ende, ndërsa ende nuk dihet kur palët do të ulen në tryezën e përbashkët.
Bisedimet janë zgjatur nga çfarë ishte planifikuar për shkak të pikës që ka të bëjë me asociacionin i komunave me shumicë serbe. Mësohet se Kurti ka kundërshtuar që drafti i asociacionit të paraqitet vetëm 15 ditë pas marrëveshjes.
Ndërkohë në një dalje për mediat nga Ohri, zëdhënësi I BE-së Peter Stano, hermetik për të dhënë informacione nga bisedimet, tha se takimi mund të përfundojë pasdite ose edhe në mbrëmje. Stano tha se shefi i politikës së Jashtme të BE-së, Josep Borrel tha se do të dalë para gazetarëve në përfundim të takimit.
