Nga Mitro Çela
Taqo është pronar i hotel “Doro”. Dy ditë më parë më tha:
-Mitro duhet të agjërosh! Një japonez ka fituar çmimin “Nobël” për agjërimin! Ha një herë në ditë. Drekën në orën 16. Pastaj vetëm çaj! E bën?
-Do e bëj sepse do zbatoj porosinë e Ramës: “Agjërimi ilaç kundër virusit”!
-Lere sarkazmën! Fillo agjërimin! Çfarw ha në mëngjes?
-Cereal me qumësht…
-Skandal….
Qumësht Parmalat?…Pse sa lopë ka Italia që të ushqejë me qumësht italianët dhe shqipot?! Jazëk qumështit. Ha vetëm tërshërë…
-Mos më ngatërron me kalin?
-Lere ironinë! Hidh tërshërë në filxhan. Zbute me ujë. Aty i ke të gjitha:
proteina, fibra, vitamina.
-Alo… Jam Taqo. Agjërove?
-Po. Por natën, nga uria, për pak hëngra Ezmerkën!
-Ha…ha! Më mirë të hash gruan se sa të dëmtosh shëndetin!…Mos iu ndaj çajit, por shto edhe çaj me trëndafil të egër…Dhe agjëro.
U bëra pak Hamlet: Të agjëroj apo të mos agjëroj?! Mos ia fut si kau pelës Taqoja?
Hapa internetin…Kur agjëron, stomaku “bluan” për qejf të vet. Satelitët e stomakut: mëlçia, tëmthi, veshkat, zemra punojnë më ritmin që i ka “gatuar” perëndia. Indet nuk marrin ushqim nga stomaku, por hanë dhjamin e krijuar.
Përsëri ra telefoni:
-Alo jam Bert Kushe!..E fillove agjërimin?
-Edhe ti more Brut?
-Leri përrallat. Fillo! Të është bërë barku si tullumbac! Agjërimi nuk është shkencë e ditëve tona. Kurani porosit-Mbani Ramazan. Bile e quan Muaji i Shënjtë i Ramazanit. Në Bibël shkruhet-Kreshëm!
-Berti! I je futur teologjisë?
-Jo. Ndjek dietat e ushqimit. Në ushqim duhen futur gjërat e fermentuara: kos, turshi. Perimet e ziera…Me fermentim dhe gjërat e ziera-virusi del jashtë loje!
