Misioni i ODIHR për monitorimin e zgjedhjeve lokale të 14 majit do të drejtohet nga një emër i njohur për politikën shqiptare, Audrey Glover. Britanikja është caktuar sërish Shefe e Misionit të Vëzhguesve të ODIHR, për procesin e 14 majit dhe menjëherë që prej ditës së sotme ka nisur takimet me drejtuesit e institucionet shtetërore, ku mesditën e kësaj të enjte u prit në KQZ nga Komisioneri Ilirjan Celibashi.
Emri i Audrey Glover është shumë i njohur për protagonistët e politikës shqiptare në këto 30 vite. Për herë të parë në Shqipëri, Glover vëzhgoi zgjedhjet e vitit 1996. Në ato zgjedhje fitoi Partia Demokratike, por pati shumë kontestime nga opozita dhe situata agravoi deri ngjarjet e vitit 97’.
Për ato zgjedhje, raporti i OSBE-ODIHR ka qenë një nga më negativët duke theksuar shumë vërejtje mjaft të rënda për procesin. Raporti i ODIHR i cilësoi zgjedhjet e 96-ës si “jo të lira dhe të ndershme”. Kjo bëri që Presidenti i asaj kohe, Sali Berisha të lëshonte akuza mjaft të rënda ndaj saj duke e cilësuar “kapomafia” dhe madje e shpalli atë edhe “non grata”.
Pas këtij prezantimi të parë me politikën shqiptare, Glover u rikthye në Shqipëri në vitin 2009 për të drejtuar misionin e vëzhguesve të ODIHR për zgjedhjet parlamentare.
Më pas Glover do të vinte edhe dy herë të tjera në Shqipëri për të drejtuar misionin e ODIHR në zgjedhjet lokale të 2015-ës dhe 2019-ës. Për zgjedhjet lokale të 14 majit, Audrey Glover do të drejtoj një mision me 324 vëzhgues me afat të gjatë.
