Organi më i lartë kushtetues i Francës ka miratuar rritjen e moshës së pensionit nga 62 në 64 vjeç dhe rrëzoi thirrjet për një referendum nga opozita, shkruajnë mediat e huaja.
Këshilli Kushtetues hodhi poshtë disa nga reformat, duke argumentuar se kishin të meta ligjore.
Kujtojmë se kundër këtij vendimi të presidencës së Emmanuel Macron, janë mbajtur dymbëdhjetë ditë protesta që prej janarit.
Qeveria e Macron, e ka argumentuar këtë vendim se: “ndryshimet ishin thelbësore për të parandaluar kolapsin e sistemit”.
Vendimi u prit me tallje në qendër të Parisit mbrëmjen e së premtes, ku ishin mbledhur turmat e protestuesve. Ndërkohë, autoritetet kishin ndaluar demonstratat para ndërtesës së Këshillit Kushtetues deri të shtunën në mëngjes.
Disa demonstrues kishin vendosur të vazhdonin të protestonin derisa të tërhiqeshin ndryshimet.
Autoritetet kanë vendosur barriera në rrugët pranë gjykatës kundër frikës së trazirave. Policia është në gjendje gatishmërie pas paralajmërimeve për protesta të mëtejshme, potencialisht të dhunshme.
