Është zbardhur vendimi i arsyetuar i KAS në lidhje me refuzimin e kërkesës së koalicionit “Bashkë Fitojmë” për vendosjen e emrit të ish-kryeministrit Sali Berisha në fletën e votimit, si drejtues i koalicionit.
KAS sqaron se kërkesa e tyre nuk u pranua për shkak se Berisha është përjashtuar nga KQZ nga koalicioni “Bashkë Fitojmë”, duke i ndaluar në këtë mënyrë edhe pjesëmarrjen në zgjedhje dhe për pasojë, ai nuk mund të jetë drejtuesi i këtij koalicioni.
Nën vazhdën e këtij arsyetimi, KAS shton më tej në vendim se duke qenë se partia udhëheqëse e këtij koalicioni është Partia e Lirisë, atëherë rrjedhimisht kryetari i saj, Ilir Meta duhet të njihet zyrtarisht nga KQZ si përfaqësues i koalicionit “Bashkë Fitojmë”.
“Gjithashtu KAS-i konstaton, se me vendimin nr. 178, datë 18.03.2023, Komisioneri e ka përjashtuar nga koalicioni “Bashkë fitojmë” subjektin “Partia Demokratike” me kryetar z. Sali Berisha, duke i ndaluar de facto pjesëmarrjen në zgjedhje.
Ligjërisht deputeti Sali Berisha dhe grupimi i tij politik nuk janë pjesë e koalicionit “Bashkë Fitojmë”, për pasojë deputeti Sali Berisha nuk mund të jetë ligjërisht drejtues i tij.
I pyetur nga KAS-i, përfaqësuesi i palës së interesuar nuk dha asnjë të dhënë për ndonjë lidhje/raport juridik të deputetit Berisha me koalicionin ose me ndonjërën nga partitë pjesëmarrëse të tij, me të cilin të mund të justifikonte ligjërisht kërkesën e paraqitur. 18. Sipas marrëveshjes së koalicionit “Bashkë Fitojmë” të datës 15.03.2023, partia udhëheqëse e tij është Partia e Lirisë.
“Parti udhëheqëse e koalicionit, sipas parashikimeve të nenit 65 e vijues të Kodit Zgjedhor, është Partia e Lirisë” thuhet në këtë marrëveshje.
Kjo do të thotë se palët e marrëveshjes kanë pranuar me vullnet të lirë, në momentin e krijimit të koalicionit, se për zbatimin e nenit 65 të Kodit Zgjedhor, KQZ-ja duhet të njohë dhe pranojë Partinë e Lirisë dhe kryetarin e saj, z. Ilir Metaj si përfaqësuesit zyrtarë të koalicionit”, thuhet në vendimin e KAS.
KAS vendosi të mërkurën (19 prill) si drejtues të koalicionit Metën, duke refuzuar kërkesën e koalicionit “Bashkë Fitojmë” për vendosjen e emrit të Berishës.
Po ashtu, KAS rrëzoi edhe kërkesën e koalicionit “Bashkë Fitojmë” për të hequr logot e partive apo koalicioneve nga përmbajtja e fletës së votimit.
