Kreu i Partisë Republikane, Fatmir Mediu, dhe kreu i PAA, Agron Duka, kanë zhvilluar një takim elektoral në Vlorë.
Dy krerët e partive përkatëse bënë thirrje që votat e tyre t’i çojnë për Hysni Sharrën.
“Këtu nis puna se nuk mjafton të jesh prezent në të gjitha bashkitë e vendit, por të punojmë derë më derë e bindim njerëzit që jemi alternativë pozitive”, u shpreh Duka.
Mediu theksoi se nëse shmangim përballjen sot, do humbasim të shkuarën, sakrificën e prindërve tanë dhe të ardhmen e fëmijëve tanë, ndaj i duhet bërë me dije qeverisë se nuk varemi prej saj.
“Kjo është ora e vlonjatëve dhe e shqiptarëve, të cilët nuk pranojnë poshtërimin, përbuzjen dhe mjerimin.
Kjo nuk është thjesht lufta për fitore e një partie politike, por përballja me të keqen për t’i dhënë vlerë Vlorës e Shqipërisë kundër varfërisë, krimit dhe korrupsionit. Nuk është betejë e lehtë, por e vështirë.
Nëse shmangim përballjen sot, do humbasim të shkuarën, sakrificën e prindërve tanë dhe të ardhmen e fëmijëve tanë.
Duhet t’i themi qeverisë se nuk varemi prej tyre, por prej asaj që besojmë. Të trokasim në çdo derë e në çdo zemër të cdo qytetari, të dëgjojmë me vëmendje hallet dhe problemet e njerëzve, t’i trajtojmë me dashuri e dhembshuri.
Ju ftoj që më 14 maj, të gjithë të bashkohemi për të bërë të mundur fitoren e Hysni Sharrës”, tha Mediu.
