“Pyetja që kemi tani është: Çfarë do të bëjmë me këtë rezultat? Ka dy mundësi: njëra është të sillemi me karshillëk, të shkojmë nëpër njësi e të themi fituam, kurse ju humbët. Por, kjo do të ishte mënyra më e shëmtuar për ta festuar këtë fitore.
Ndaj, ne kthehemi në njësi me mëngët e përveshura dhe i themi secilit: Pavarësisht kë votove, Partia Socialiste, kryetari ynë dhe Këshilli Bashkiak është këtu që të të shërbejë ty, familjes tënde, fëmijëve të tu, sepse në këtë qytet ne njohim vetëm ngjyrat kuqezi të flamurit, të kombit tonë, dhe kulturës sonë, për t’u shërbyer të gjithëve kudo ku janë, pa asnjë dallim.
Ndaj, do të doja që kjo verë të mos ishte një verë triumfi, të mos ishte një verë karshillëku apo mendjemadhësie, por të ishte një verë përulësie, ku u themi njerëzve: Jemi të gjithë bashkë, do i çojmë fëmijët tanë në të njëjtat shkolla, kopshte, çerdhe, rrugë, parqe”.
Gjatë takimit me banorët e njësisë nr. 1 në turin e falenderimeve, Veliaj tha se Partia Socialiste do u shërbejë të gjithëve.
“Ju siguroj se do t’i shërbejmë të gjithëve, pa asnjë dallim. Ne vërtet morëm një fitore spektakolare në njësi, por pavarësisht se fituam me mbi 50%, ne do iu shërbejmë 100% të qytetarëve të njësisë sonë.
Nëse njerëzit kuptojnë se fitoren nuk e kemi për karshillëk, por si instrument për të shërbyer, atëherë besoj se edhe ata që nuk na votuan kësaj here, është vetëm çështje dy vitesh, para se të na votojnë në vitin 2025 për fitoren e Partisë Socialiste të Edi Ramës dhe skuadrës sonë në Parlamentin e Shqipërisë,” deklaroi më tej kreu i Bashkisë.
Një ftesë e kishte edhe për këshilltarët bashkiakë që të bëhen bashkë për projektet e kryeqytetit.
