Kryeministri Edi Rama po merr pjesë në mbledhjen e Komunitetit Politik Europian në Moldavi, ku është takuar me krerët e Bashkimit Europian.
Kreu i qeverisë ka publikuar pak më parë një video nga takimi, teksa shfaqet duke biseduar me presidenten e Komisionit Europian, Ursula Von Der Leyen, presidentin serb Aleksandër Vuçiç dhe disa liderë të rajonit, lidhur me zgjidhjen e konfliktit në veri të Kosovës.
Ai thotë se duhet të zgjidhet konflikti në veri dhe t’i jepet fund kërcënimeve, si dhe të finalizohet njohja e ndërsjellë mes Kosovës dhe Serbisë.
“Rajoni duhet të hyjë në një marrëdhënie të re me BE-në, ndërkohë që konflikti në Veriun e Kosovës duhet të zgjidhet krah për krah me botën demokratike, duke u dhënë fund absurdit kërcënues e duke finalizuar marrëveshjen e normalizimit dhe njohjes së ndërsjellë mes Kosovës e Serbisë”, ka shkruar Rama krahas videos së publikuar.