Pritshmëritë për sezonin turistik po krijojnë një valë të re të mbiçmimit të lekut ndaj valutave të huaja, e veçanërisht ndaj euros.
Për këtë të fundit, Banka e Shqipërisë e llogarit sot kursin zyrtar në 108.18 lekë, në rënie me 0.55 lekë në vetëm 24 orë.
Edhe pse këtu një ndikim të madh ka dhënë edhe dobësimi kundrejt dollarit amerikan në tregjet ndërkombëtare. Vetë vlera e dollarit ndërkohë regjistroi një rritje të lehtë me 0.1 lekë.
Vetëm prej fillimit të qershorit, valuta europiane ka humbur plot 1.51 pikë kundrejt lekut, teksa gjatë muajit maj, me gjithë efektin psikologjik të zgjedhjeve, rënia ishte 1.39 lekë.
Deklaratat e ekspertëve se kursi mund të bjerë në raportin 1 me 100, si dhe qëndrimi i Bankës së Shqipërisë për të mos ndërhyrë në regjimin e lirë të tregut, po ushtrojnë më shumë presion mbi kursin.
Teksa sezoni vetëm sapo ka nisur, situata në kursin e këmbimit pritet të vazhdojë e njëjtë, të paktën deri në vjeshtë, kur pritet të ketë një rimëkëmbje.
Situata po disavantazhon eksportuesit shqiptarë, që vazhdojnë të kërkojnë mbështetje nga qeveria dhe banka qendrore, sidomos pas rënies zyrtare të eksporteve në mars dhe prill. Nga ana tjetër, zhvlerësimi i euros nuk po reflektohet në uljen e çmimeve të produkteve në supermarkete dhe dyqane.
