Sot bëhen 32 vite nga themelimi i Partisë Socialiste e për të festuar këtë, është paralajmëruar një aktivitet në Pallatin e Kongreseve.
Gazetari Roland Qafoki ishte i ftuar këtë të hënë në një lidhje direkte për Euronews Albania për të folur për rrugëtimin e kësaj partie e po ashtu tha se kush e meriton statusin si lideri historik i kësaj partie.
Sipas tij këtë status e meriton kryeministri Rama, i cili ka 25 vite në politikë dhe 10 vite që mban postin e kryeministrit dhe ka rekordin më të mirë politik në 32 vite të pluralizmit shqiptar
“Në 32 vite, Partia Socialiste ka qëndruar vetëm 13 vite në opozitë dhe 19 vite në pushtet. Në 32 vite Partinë Socialiste e ka drejtuar 14 vjet Fatos Nano dhe 18 vjet Edi Rama. Pra ai që quhet lideri historik, Nano, e ka humbur statusin e liderit historik, pasi këtë status tashmë e ka Rama.
Në 32 vite Partia Socialiste ka nxjerrë 6 kryeministra, Ylli Bufin, Fatos Nano, Ilir Meta, Bashkim Finon, Pandeli Majko dhe Edi Ramën, ndërsa Partia Demokratike ka nxjerrë vetëm Sali Berishën dhe Aleksandër Meksin, kemi dhe Vilson Ahmetin që nuk ishte i asnjë prej dy partive të mëdha, por ishte i qeverisë teknike.
Kemi edhe një të dhënë tjetër, që Edi Rama është kryetari i Partisë Socialiste që ka bilancin më të mirë në 32 vite të pluralizmit shqiptar, ai është 10 vite kryeministër, 11 vite kryetar i Bashkisë së Tiranës, 2 vite ministër kulture dhe vetëm 16 muaj në opozitë, dhe sot ai bën 25 vjetorin e hyrjen në politik.
