Ish-zëvendëskryeministri Arben Ahmetaj dëshmoi dje në SPAK për gjashtë orë në prani edhe të avokatit mbrojtës. Mbi të rëndojnë katër akuza të nisura pas aferës së inceneratorëve.
Orët e gjata të dëshmisë Ahmetaj i ka komentuar para gazetërëve me fjalinë e shkurtër: “Sqarova pozicionin tim”.
Arben Ahmetaj ka kapërcyer për herë të parë pragun e Prokuriorisë së Posaçme SPAK në lidhje me hetimet për inceneratorët. Ish-zv.kryeministri mesditën e djeshme ka dëshmuar për gjashtë orë në prani edhe të avokatit mbrojtës, pasi ai po hetohet për “shpërdorim të detyrës”, “fshehje të të ardhurave”, “korrupsion” dhe “pastrim të parave”.
Në përfundim, ai nuk pranoi të flasë për gazetarët, por tha shkurt se para prokurorëve “ka sqaruar pozicionin e tij”. Ndërkohë i pyetur nëse SPAK i ka komunikuar akuzat, Ahmetaj nuk ka dhënë asnjë përgjigje. Ai është shprehur i gatshëm që të paraqitet edhe herë të tjera nëse do të thirret nga SPAK.
Edhe avokati i tij nuk ka dhënë shpjegim se çfarë ka ndodhur në zyrat e SPAK. Ahmetaj u mor në pyetje nga disa oficerë të BKH-së dhe dha shpjegime për herë të parë në lidhje me akuzat e ngritura nga Prokuroria e Posaçme.
Kjo është hera e parë që Arben Ahmetaj është paraqitur në SPAK për t’u marrë në pyetje si person në hetim. Në fillim të muajit mars, agjentët e BKH-së kryen kontrolle në banesën e partneres së ish-ministrit Arben Ahmetaj në Hamallaj dhe në banesën e ish-bashkëshortes së tij në Tiranë.
Shtëpia në Hamallaj dhe një vilë në Palasë, që dyshohet se i përket ish-bashkëshortes së Ahmetajt, u vendosën nën sekuestro preventive nga Gjykata e Posaçme. Prokuroria dyshon se këto pasuri, por edhe të tjera janë vënë nën dyshimin e korrupsionit, shpërdorimit të detrës, pastrimit të parave dhe fshehjes së të ardhurave.
Edhe pse Ahmetaj në daljet publike ka mohuar përfshirjen në aferën korruptive të tre inceneratorëve, atij të Tiranës, Elbasanit dhe Fierit, sërish për prokurorinë ka dyshime të arsyeshme se ka pasur njohje direkte me Klodian Zoton dhe Mirel Mërtitirin, dy nga pesonat e shpallur në kërkim për aferën e inceneratorëve.
Hetimet jashtë Shqipërisë
Hetimi i nisur nga SPAK ndaj ish-zëvendëskryeministrit, Arben Ahmetaj, është shtrirë edhe jashtë kufijve. Burime zyrtare të Prokurorisë së Posaçme, konfirmuan se për llogari të këtij hetimi, i regjistruar në numrin 277/1, janë dërguar disa letërporosi jashtë vendit.
Sipas burimeve, përmes tyre është kërkuar kryerja e verifikimeve nga autoritetet e këtyre vendeve për dyshimet e ngritura ndaj ish-zëvendëskryeministrit dhe ministrit të Financave për mundësinë e përfshirjes në korrupsion, pastrim të parave apo fshehjes së pasurisë.
Për disa nga këto letërporosi, SPAK ka marrë përgjigje dhe është duke përpunuar informacionin e përcjellë, ndërsa për të tjerat është ende në pritje.
Ankimi për sekustrimin
Në fillim të muajit prill të këtij viti, avokatët e ish-ministrit të Financave ankimuan në Apel vendimin e GJKKO për sekuestrimin e një vile në Palasë dhe një në Hamallaj, që sipas SPAK, zotërohen nga ish-bashkëshortja dhe partnerja aktuale e ish-ministrit.
Sipas burimeve nga SPAK, vila në Palasë është pjesë e një kompleksi rezidencial dhe dyshohet se zotërohet nga ish-bashkëshortja e ish-ministrit të Financave. Godina në fjalë nuk rezulton e regjistruar në emër të ish-bashkëshortes së Ahmetajt, por në emrin e një zonje, rreth miqësor i saj.
Vetë ish-bashkëshortja e zyrtarit të lartë ka mohuar të ketë lidhje me këtë objekt. Ndërsa vila në Hamallaj e vënë në sekuestro me vendim gjykate i përket bashkëjetueses aktuale të ish-zv.kryeministrit, Ahmetaj. Ambientet e të njëjtës vilë iu nënshtruan një kontrolli nga agjentët e BHK, më 8 mars.
Akuzat për inceneratorët
Ahmetaj është një nga personat më të akuzuar nga ana e opozitës, si i përfshirë në çështjen e inceneratorëve, për të cilën SPAK ka marrë disa të pandehur, mes tyre edhe ish-ministrin e Mjedisit, Lefter Koka dhe ish-deputetin e PS, Alqi Bllako.
Në korrik të vitit të kaluar, Ahmetaj u shkarkua nga posti i zv.kryeministrit dhe i ministrit për Rindërtimin, por nuk u emërua në asnjë pozicion tjetër brenda kabinetit Rama.
Gjithashtu, ai nuk u konfirmua si drejtues politik i PS-së në Vlorë, pozicion që iu besua Blendi Klosit. Në lidhje me këtë çështje ka folur edhe Kryeministri Rama, i cili iu përgjigj deklaratave të ish-zv.kryeminsitrit, Arben Ahmetaj, se ai duhet të bëjë kryeministrin, jo gjykatësin.
“Nëse unë do të kisha bërë rolin e gjykatësit, gjërat do të kishin qenë shumë më keq për ata që duan që unë të kisha bërë gjykatësin”, tha Rama gjatë një komunikimi për gazetarët në përfundim të mbledhjes së kryesisë së PS-së.
