Kolegji Zgjedhor rrëzoi ankimin e ‘BF’ pas rinumërimit të 18 kutive për Bashkinë e Kuçovës.
Kandidati i Bashkë Fitojmë Lefter Maliqi, në një komunikim me mediat u shpreh se ky ishte një vendim politik dhe se sot fitoi krimi e korrupsioni.
“Në vjeshtë më kandidat tjetër. E dini shumë mirë që me këtë kandidat ishte e pamundur. Votim afrikan në Kuçovë, e patë shumë mirë, ndërsa Kodi Zgjedhor thotë vota është e fshehtë, procesverbalet mungonin, pra yrra byrra votoni se partia shtet e di vetë se kë nxjerr.
Unë do vazhdoj betejat politike për t’i kthyer dinjitet qytetarëve të Kuçovë. Qeveritarët duhet ti kapësh si Gjici me provë, me presh në dorë, në gojë. Edhe ky Hajdari si ai ishte, nuk ka prova por e di gjithë Kuçova”, tha ai.
Ndërkohë kujtojmë që sot u bë rinumërimi për 18 kutitë e bashkisë Kuçovë, proces që nisi pas kërkesës së koalicionit “Bashkë Fitojmë” për rivlerësim të votave dhe shpalljen e pavlefshmërisë së zgjedhjeve në këtë bashki.
