Kreu i SPAK, Altin Dumani nga foltorja e Kuvendit bëri bilancin e punës për vitin e kaluar dhe adresoi problematikat që kjo hallkë e rëndësishme e drejtësisë në vend has aktualisht. Problemi kryesor sipas Dumanit janë çështjet e mbartura, gjë e cila vështirëson punën e prokurorëve, por edhe dështimi i ekstradimeve nga Dubai, ku fshihen disa të kërkuar nga drejtësia.
“Problematikë është mungesa e ekstradimit të eksponentëve të krimit të organizuar, kryesisht nga Emiratet e Bashkuara Arabe, një problematikë e cila ka vënë në vështirësi hetimet sa i takon përballjes së autorit të veprës penale me sallën e gjyqit. Procedurat e ekstradimit vazhdojë dhe deri tani nuk kemi marrë asnjë refuzim, Por s’kemi asnjë të ekstraduar nga Emiratet e Bashkuara Arabe”, tha ai.
Referuar hetimeve për shumë dosje, Dumani theksoi se janë përdorur shumë përgjimet. Ai dha shifra konkrete. Drejtuesi i SPAK-ut tha se janë mbi 12 mijë qytetarë të përgjuar për korrupsion apo krimin e organizuar.
“Ka një rritje nga viti 2021 të përdorimit të hetimeve proaktive në 122 procedime penale ku janë interceptuar 2177 pajisje fundore. Pjesën më të madhe të procedimeve penale ku është kërkuar përgjimi e kryesojnë çështjet e hetuara për veprën penale të korrupsionit me 69 procedime penale ku janë interceptuar 10,023 pajisje fundore.
Ndërkohë për çështjet penale të hetuara në kuadër të grupit të strukturuar kriminal janë përdorur metoda të posaçme hetimore në 53 procedime penale dhe janë interceptuar 1154 pajisje fundore. Kur bëhet fjalë për metoda speciale të hetimit vlen të theksohet se janë përdorur simulimi i aktit korruptiv, dorëzimi i kontrolluar apo dhe agjenti i infiltruar”, deklaroi ndër të tjera drejtuesi i SPAK.
