Mediat ndërkombëtare kanë raportuar për një ngjarje të rëndë që ka ndodhur gjatë ditës së sotme në një nga resortet turistike të ishullit Hvar në Kroaci. Legjenda e futbollit botëror, ish-portieri Edwin van der Sar, ka përfunduar i shtruar në spital për shkak të një hemorragjie cerebrale.
Klubi i Ajax, ku ai kishte punuar se fundi si drejtor sportiv, konfirmoi lajmin, i cili ishte përhapur fillimisht nga mediat kroate dhe ato holandeze. Mësohet se van der Sar gjendet aktualisht i shtruar në spitalin e Splitit, ku është dërguar me urgjencë me helikopter, pasi ka pësuar një hemorragji cerebrale teksa gjendej në një nga restorantet më të famshme të ishullit.
Nuk dihen ende shkaqet e kësaj situatë të rëndë, por mediat kroate kanë mësuar nga spitali ku është i shtruar ish-portieri i Ajax, Juventus, Manchester United dhe përfaqësueses së Holandës, se gjendja tashëm është e stabilizuar dhe se ai gjendet në repartin e terapisë intensive ku është nën kontrollin e mjekëve.
