Juristi Jordan Daci tha se ish-zv.kryeministri rrezikon deri në 12 vite burg për akuzën e korrupsionit aktiv të zyrtarëve të lartë.
Daci tha në MCN Tv, se nëse Ahmetaj shpallet fajtor dhe do të prezumonte për një dënim më të vogël, atëherë do të përfitonte 7-8 vite burg. Sipas avokatit, janë akuza të rënda dhe serioze që bien ndaj një ish-zyrtari të lartë.
“Akuzat janë serioze se bëhet fjalë për një mal me akuza, nga korrupsioni pasiv i zyrtarëve të lartë deri tek pastrimi i produkteve të veprës penale dhe tek fshehja e të ardhurave, e pasurisë. Janë disa vepra për të cilat akuzohet, janë një mal me akuza që në një gjykim të mundshëm dhe shpallje fajtor nënkupton shumë vite burg.
Së pari kemi disa akuza, varet nëse do provohen të gjitha, apo vetëm një. Për korrupsion aktiv të zyrtarëve të lartë është deri në 12 vite burgim maksimumi, kur janë disa vepra ka bashkim dënimesh dhe zbatohen rregulla të ndryshme, nga ajo me përthithje. Prezumohet për një dënim jo të vogël, nëse do shpallej fajtor do ishte mbi 7-8 vite dënim përfundimtar. Shpresoj të marrë drejtësinë që meriton”, tha Daci.
