Dialogu i vazhdueshëm me prodhuesit shqiptarë, është instrument parësor i qeverisë tonë për të adresuar në mënyrën më të mirë mbështetjen, planet e strategjitë e një prej sektorëve jetikë për vendin, duke vendosur ura të reja bashkëpunimi për të mbrojtur dhe forcuar prodhimin vendas.
Kështu deklaroi ministrja e Bujqësisë dhe Zhvillimit Rural, Frida Krifca në takimin me Bashkimin e Prodhuesve Shqiptarë, që u zhvillua ditët e fundit në Tiranë, teksa vlerësoi këtë organizëm, të përbërë nga sipërmarrës që operojnë në sektorë të rëndësishëm të ekonomisë të prodhimit bujqësor, blegtoral, peshkimit, agropërpunimit dhe eksporteve.
“Jemi me Bashkimin e Prodhuesve Shqiptarë për të kremtuar punën dhe zhvillimin e një viti si dhe për të forcuar urat e bashkëpunimit mes këtij bashkimi dhe qeverisë, çka ka udhëhequr zhvillime të rëndësishme për vendin tonë”, u shpreh ministrja.
Krifca tha se, “falë punës së bërë dhe angazhimit tonë, kemi mundur të çojmë bashkërisht përpara një sërë nismash që përmirësojnë dhe avancojnë sektorin me: ndërtimin e një kuadri të ri e të plotë ligjor për vreshtarinë, verën dhe për mjaltin; zgjerimin e infrastrukturës së tregjeve për prodhuesit; zgjerimin e aksesit në tregje rajonale dhe europiane për eksportet bujqësore; certifikimin e produkteve të origjinës”.
Gjatë fjalës së saj, Krifca u ndal edhe në zgjerimin e mbështetjes financiare të këtij sektori.
“Kemi rritur ndjeshëm aksesin në asete të subvencionuara në infrastrukturë magazinimi me standarde të larta, teknologji dhe inovacion në industrinë ushqimore, si dhe aksesin në financime e në programe zhvillimi, të cilat kanë ndihmuar ndërtimin e zinxhirëve prodhues të fuqishëm”, u shpreh ministrja.
Ajo shprehu angazhimin për intensifikimin e mbështetjes që i jep hov zhvillimit të prodhimit vendas dhe eksporteve.
“Do të vazhdojmë punën në këtë drejtim duke vendosur në funksion edhe programe të reja zhvillimi që do t’i sjellin një hov edhe më të madh synimit të përbashkët për të fuqizuar prodhimin vendas”, deklaroi ministrja Krifca.
