Kreu i Partisë Demokratike Lulzim Basha në mbledhjen e kolegjit të kryetarëve ka deklaruar se nuk do të lejojë askënd që të luajë me interesat e kësaj force politike.
Duke iu referuar përplasjeve brenda Partisë Demokratike, kryesisht me ish-kryeministrin Sali Berisha dhe grupit të tij politik, Basha tha se tashmë forca politike që ai drejton do të zhvillojë betejën për të mos lejuar që demokratët të shkojnë drejt Berishës.
Sipas tij, elementët antiamerikanë nuk do ta dëmtojnë më PD-në.
“Ata që për interesat e tyre personale shkaktuan krizën në Partinë Demokratike dhe për llogaritë e tyre personale në raport me drejtësinë, në raport me pasuritë e paligjshme, por harrojnë që as demokratët dhe as Partia Demokratike nuk iu ka asnjë borxh por jemi të gjithë ne borxhlinj para demokratëve dhe shqiptarëve.
Mënyra e vetme për ta kthyer këtë borxh është për të qëndruar në ballë të axhendës publike dhe përballë një qeverie që ka vendosur rekordet e korrupsionit krah për krah krimit të organizuar dhe po kështu në ballë të një alternative jo vetëm shpresëdhënëse por realiste.
Të jemi të hapur nuk do të thotë të shprehim vullnetin për t’i angazhuar këto potenciale, por aktivisht t’i bëjmë të ndihen në shtëpinë e tyre. Sapo kemi konfirmuar që vlerat dhe qëndrimet janë të njëjta. Tek ne mbizotëron mendimi për të bërë betejë vetëm për interesin e qytetarëve.
Këtë betejë do ta bëjmë me çdo sakrificë. Nuk do të lejoj askënd të luajë me interesat politike të Partisë Demokratike që kërkon të çojë demokratët symbyllazi në hullitë e nongratave sepse ne hymë në këtë betejë për të mbrojtur interesat e Partisë Demokratike si interesa euroatlantike. Elementët antiamerikanë, Partinë Demokratike nuk e dëmtojnë më”, u shpreh Basha. / S.M
