Përveç tragjedive që sjellin, fatkeqësitë natyrore janë dhe rasti kur shohim të ndodhin mrekullitë më të mëdha.
Kështu ka ndodhur edhe në Libi, teksa vendi po përballet me pasojat shkatërruese që lanë pas përmbytjet. Një javë pas përmbytjeve që goditën vendin, një familje me pesë anëtarë u nxorr e gjallë nga rrënojat nën të cilat ishin bllokuar, pas një operacioni shpëtimi në një zonë pranë Dernës.
Të 5 familjarët janë jashtë rrezikut për jetën, edhe pse kanë marrë disa plagë dhe janë të dehidratuar pasi kanë qëndruar pa ujë dhe pa ushqim.
Sakaq, Prokurori i Përgjithshëm ka njoftuar hapjen e një hetimi për shembjen e dy digave që shkaktuan përmbytjen katastrofike në Derna. Sipas rikonstruksionit të parë të fakteve, digat e dëmtuara janë ndërtuar në mesin e viteve 1970 nga një kompani nga Jugosllavia, bazuar në kërkesat e sigurisë së kohës.
Kryebashkiaku i Dernës pranoi se mirëmbajtja e digave nuk është kryer siç duhet që nga viti 2002, ndërsa bombardimet e NATO-s, lufta civile dhe trazirat e mëvonshme vetëm sa e kanë përkeqësuar situatën.
Mbi dy milionë dollarë janë ndarë për mirëmbajtjen e digave dhjetë vjet më parë, por ka dyshime se paratë përfunduan diku tjetër.
Për OKB-në, nëse Libia do të kishte pasur një sistem adekuat të paralajmërimit të motit, tragjedia mund të ishte shmangur, ose të paktën mund të ishte lëshuar një urdhër evakuimi efektiv./ S.M
