Napoli nuk mundi të marrë më shumë se një pikë në transfertën e Bolognas, që u mbyll me rezultatin 0-0.
Megjithatë përveç rezultatit një nga momentet që tërhoqi më shumë vëmendje ishte zëvendësimi i Osimhen nga Simeone në minutën e 86’.
Ky zëvendësim nuk u prit aspak mirë nga sulmuesi i Napolit, i cili u zemërua keq me trajnerin Rudi Garcia.
I pyetur pikërisht për këtë rast, kreu i stolit të Napolit e justifikoi atë veprim duke thënë se Osimhen ishte i zemëruar me performancën e tij.
“A janë reagime të tilla shqetësuese? Gjëja më e mirë është se kur largohet ai nuk është i lumtur. Mund të jesh i pakënaqur me performancën tënde”-deklaroi Garcia, i cili më tej shtoi se kushdo mund të humbasë penallti, duke qetësuar gjakrat.
“Edhe më të madhit në histori i ndodh të humbasë penallti. Ne luajmë çdo katër ditë dhe lojtarët e dinë se do të zëvendësohen, kemi edhe lojtarë të tjerë që janë në stol, por që do jenë pjesë e ndeshjeve”-tha ndër të tjera trajneri i Napolit.
