Fredi Beleri i është drejtuar me një kërkesë përmes avokatëve, Gjykatës së Shkallës së Parë Durrës, për t’u lejuar që të kryejë betimin si kryetar i Bashkisë së Himarës. Mësohet se kërkesa ka mbërritur pak ditë më parë dhe do të shqyrtohet në ditët në vijim.
Ndërkohë më herët Gjykata e Lartë rrëzoi për herë të dytë rekursin e Fredi Belerit, i cili kërkoi masë më të lehtë sigurie se ajo e arrestit me burg.
Kujtojmë se kryebashkiaku i Himarës ndodhet në paraburgim prej datës 12 Maj, dy ditë para zgjedhjeve lokale, pasi u kap në flagrancë duke premtuar dhe dhënë para për të blerë vota. Pavarësisht se ishte në qeli, ai arriti të fitonte dhe të merrte mandatin nga KQZ.
Fredi Beleri, kandidat i koalicionit opozitar “Bashkë Fitojmë”, u arrestua dy ditë para zgjedhjeve të 14 Majit dhe bashkë me bashkëpunëtorin e tij Pandeli Kokaveshi, akuzohen për blerje votash.
Prokuroria dhe Policia e Vlorës e ndoqën rastin me metoda speciale hetimi, duke përdorur agjent të infiltruar, i cili për tetë vota mori 400 mijë lekë të vjetra. Beleri dhe Kokaveshi u arrestuan në kushtet e flagrancës./ S.M
