Një ngjarje e rëndë ka ndodhur në Tiranë, ku një fëmijë 3 vjeç humbi jetën pak ditë pasi iu nënshtrua një ndërhyrje kirurgjikale për rregullimin e dhëmbëve në një klinikë dentare, në Rrugën e Kavajës.
Djali 3 vjeçar është dërguar në klinikë nga familjarët e tij për të mbushur një dhëmb. Pasi mjeku i ka bërë grafinë, u ka thënë prindërve se fëmija ka nevojë për rregullimin e 14 dhëmbëve dhe për shkak të numrit të lartë të tyre është vendosur të ndërhyhet me narkozë.
Mësohet se anestezia është kryer nga vetë mjeku Roland Xhaxho ndërsa ndërhyrja kirurgjikale për dhëmbët është bërë nga Ina Xhaxho, vajza e mjekut, e cila është mjeke dentiste.
Pasi kanë mbaruar ndërhyrjen, djali nuk është zgjuar dhe sipas familjarëve mjeku u ka thënë që të shkonin në shtëpi se do të zgjohej.
Teksa kanë vërejtur se gjendja e fëmijës së tyre po përkeqësohej, ata kanë telefonuar klinikën, por asnjë njeri nuk u është përgjigjur në telefon.
Prindërit e kanë dërguar djalin në pediatri, por pas 3 ditësh në gjendje kome, fatkeqësisht ndërroi jetë.
Familjarët e vogëlushit u paraqitën në komisariatin numër 4 dhe bënë kallëzim për ngjarjen e rëndë. Gjyshi i vogëlushit thotë se mjekët fshehën ngjarjen.
“Kur e nxorri nga salla, djali ishte në gjendje kome. Neve para se të dilte nga salla, na thoshte se është mirë dhe se puna po ecën mirë. Në orën 7:20 në darkë, neve na thanë se do ta merrni fëmijën. Direkt sa erdhi në shtëpi, iu ngrit temperatura. U bë akull. U zberdh. Morën telefonion doktorin por nuk na e hapi telefonin. E çuam tek Nënë Tereza.
Mjeku dhe stafi i klinikës janë marrë në pyetje nga hetuesit. Ata kanë deklaruar se i kanë dhënë sasinë e duhur të ilaçeve e të narkozës. Rasti është referuar në prokurori për veprë penale “Mjekim i pakujdesshëm”.
“Në klinikën private ku mori shërbimin dentar fëmija 3 vjeç dhe më pas humbi jetën nuk përgjigjet askush. Ngjarja ka nisur të verifikohet ndërsa spitali nuk pranon të japë asnjë sqarim. Punonjësit e spitalit thonë se nuk janë të autorizuar për të dhënë informacion lidhur me këtë rast. Ndërsa nën hetim në gjendje të lirë janë mjeku Roland Xhaxho, i cili ka bërë anestezinë dhe e bija e tij, Ina Xhaxho që ka bërë ndërhyrjen.”, raporton gazetarja Gerta Vasku.
Policia dhe prokuroria janë në pritje të përgjigjes së autopsisë së vogëlushit 3 vjeçar për të kryer veprimet e mëtejshme hetimore./I.S
