Për herë të parë, Shqipëria është vendi pritës i Kupës Europiane të Shahut, eventi prestigjioz më i rëndësishëm në Europë, i cili ka sjellë në vendin tonë edhe legjendën botërore të shahut, ish-kampionin Garry Kasparov. Kasparov u prit në takim nga kryetari i Bashkisë së Tiranës, Erion Veliaj, i cili i dhuroi atij “Çelësin e Qytetit”.
Gjatë takimit, kryebashkiaku Veliaj kujtoi qëndrimet e mëhershme të Kasparovit si aktivist, por edhe si mbështetës i zëshëm i Ukrainës.
Garry Kasparov vlerësoi mbështetjen dhe kontributin e Tiranës për Ukrainën, teksa shtoi se vende shumë herë më të pasura dhe më të fuqishme nuk po bëjnë sa duhet për popullin ukrainas.
“Asgjë nuk më jep më shumë kënaqësi se sa kur shoh se si qyteti që dikur jetoi në errësirë, i izoluar nga pjesa tjetër e botës, tani po tregon pasion për të promovuar lirinë.
Jam i lumtur për mbështetjen që i keni dhënë popullit ukrainas sepse Ukraina është tashmë në vijën e parë të kësaj beteje të pambarimtë, midis lirisë dhe terrorit. Këtu, në Tiranë, ndihem mes miqsh!
Disa qytete, përfshirë edhe tuajin, po bëjnë shumë më tepër sesa shumë qytete të pasura, të cilat thjesht kërkojnë justifikime dhe jo të veprojnë me vendime. E vlerësoj mbështetjen tuaj në këto vite të errëta, ndihmën për të fuqizuar kërkesën tonë për liri.
Vajte-ardhjet në Tiranë duket sikur më japin energji për punën time, për Ukrainën dhe për miqësinë tonë”, tha Kasparov.
Garry Kasparov është një kritik i zëshëm i Putinit për më shumë se një dekadë, duke udhëhequr opozitën pro-demokratike në zgjedhjet presidenciale të vitit 2008./ S.M
