Tirana dje ishte vendi mikpritës i liderëve të BE dhe Ballkanit, me rastin e Samitit të Proçesit të Berlinit. Mungesa e presidentit Emmanuel Macron u vu re, megjithatë kreu i shtetit francez kishte lajmëruar se do të vinte më vonë dhe mbërriti në orën 19.30. Meqenëse nuk arriti dot të ishte këtu për drekën, kryeministri shqiptar bëri të pamundurën që ta respektonte me një darkë në Pallatin e Brigadave.
Darka, e cila kishte ndërthurje të pjatave shqiptare me ato europiane, u servir mjeshtërisht nga shefi i kuzhinës së një prej restoranteve më me emër në Tiranë: restorant Tribe.
Pjatat e mirëseardhjes/ Bukë e shtëpisë, gjalpë dhie, kripë të trashë, salcë kosi
Pispili/ domate turshi Korçe, kackavall krokant, buqetë sallate
Fasule pllaqi / faqe viçi, pure shafrani i Dumresë, vaj rigoni, chips byreku
Fileto viçi/ salcë kallmet me kumbulla të egra, pure selino, tartuf i bardhë, tortë orizi me kërpudha dhe qepë të karamelizuara
Fli e pjekur në saç / fiq të karamelizuar, krem lajthi të pjekura, salcë karamele
Gjatë darkës, presidenti Macron u shpreh:
“Po ngre gotën time për Shqipërinë, popullin shqiptar, për lidhjet e ngushta e kaq të veçanta, që na bashkojnë. Për Evropën që ndërtojmë bashkë. Rroftë Shqipëria, rroftë miqësia franko-shqiptare!”, tha ai në gjuhën shqipe, fjalë të cilat ia kishte mësuar ish-kapiteni i skuadrës kombëtare, Lorik Cana. / S.M
