Pas incidentëve në Parlament gjatë seancës së të hënës ku pati edhe konfrontim fizik mes deputetëve të PS-së dhe atyre të PD-së, dje Këshilli i Erikës ka marrë vendimin për përjashtimin nga punimet parlamentare të gjashtë deputetëve “agresivë” të PD-së.
Teksa priteshin të merreshin masa ndëshkuese për ngjarjet e së hënës në sallën e Parlamentit, deputetët e PD-së mësynë dje edhe në kryesinë e Kuvendit ku u mbajt mbledhja e Këshillit të Etikës. Gjastë shqyrtimit të incidenteve të së hënës edhe dje janë regjistruar disa përplasje në mbledhje, por nuk kanë përfunduar në konfrontime fizike. Deputetët e Partisë Demokratike nuk i kanë shpëtuar as kësaj here përjashtimit. Të hënën i mbaroi koha e “përjashtimit” dhe dje u dënuan sërish për veprimet në sallën e Kuvendit. Komisioni i Etikës ka përjashtuar, pasditen e së martës, gjashtë deputetë të Partisë Demokratike. Vendimi është marrë nga Komisioni, pa praninë e opozitës, pas seancës plenare të së hënës gjatë së cilës, Kuvendi nuk kreu dot punime për shkak të kaosit të shkaktuar nga deputetë të “Rithemelimit”. Kjo është një strategji e PD-së të cilës pasi iu rrezuan disa kërkesa siç është ngritja e disa komisioneve hetimore kryesia e “Grupit të Rithemelimit’ që drejtohet nga Sali Berisha mori vendimin për të mos lejuar zhvillimin normal të punomeve parlamentare, qoftë kjo edhe me koston e përjashtimeve. Por nga ana tjetër mazhoranca e PS-së po tenton që ta kalojë lehtësisht, duke marrë masa pas çdo séance dhe përdorur forcën e kartonit për të përjashtuar “deputetët rebelë” të PD-së. Në këtë vazhdë edhe mbledhja e djeshme mori vendime për masë disiplinore ndaj gjashtë deputetëve të PD-së. Në këtë mënyrë deputeti demokrat, Saimir Korreshi, është përjashtuar për tri ditë, ndërsa, pesë deputetë të tjerë për dhjetë ditë. Kurse, deputeti Lefter Gështenja nuk është përjashtuar. Më herët, gjatë ditës së djeshme, kreu i Rithemelimit, Sali Berisha deklaroi për gazetarët se vendimi nuk do të njihet nga ana e grupimit që ai drejton. Kujtojmë se më herët, gjatë ditës së djeshme, ka pasur edhe përplasje nëpër korridore të Kryesisë së Kuvendit mes deputetëve demokratë dhe kryetares së Sekretariatit të Etikës, Klotilda Bushka e cila nuk ka pranuar që të tërhiqet nga vendimet e saj. Deputetët e Rithemelimit kërkuan prezencën e shtatë deputetëve që pritej të përjashtoheshin, si dhe prezencën e medias. Kërkesa këto që janë rrëzuar. Më I rëndë në seancën e së hënës ishte incidenti mes deputetit demokrat Gledion Nallbati dhe atij socialist Vullnet Sinaj. Mes tyre pati shtyrje dhe më pas tentativë për të goditur me grusht nga ana e Nallbatit. Por ndërsa
Mbledhja
Mbledhja e Sekretariatit të Etikës po shoqërohet me debate të ashpra. Deputeti demokrat Saimir Korreshi i është drejtuar kryetares së sekretariatit të etikës Klotilda Bushka, duke i thënë se nuk do t’i lejojnë t’i përjashtojnë pa asnjë lloj argumenti. “Je prapë në shkelje sepse nuk na ke dërguar asnjë material ku argumenton se pse po përjashtohen anëtarët e opozitës. Keni kaq ditë e nderuar kryetare që po bën si t’ju dojë qejfli dhe jeni duke tallur të gjitha me ne. Nuk do të lejojmë të na përjashtoni pa asnjë lloj argumenti, nuk mund të na mohoni fjalën në parlament dhe në komisione. Ti vazhdon ta kthesh këtë sekretariat të etikës të privatizuar”, tha Korreshi. Por, më pas situata ka eskaluar deri në përplasje fizike, ku deputeti Flamur Noka është ngritur nga vendi i tij dhe i ka hequr mikrofonin Klotilda Bushkës, ndërsa nuk ka ngurruar ta bëjë këtë gjë edhe me deputetët e tjera socialiste të pranishme në sallë. Ndërsa, është dashur ndërhyrja e Gardës së Republikës për të vendosur rendin në sallën e mbledhjeve. Kujtojmë se, në këtë mbledhje do të jetë një pjesë e madhë e deputetëve të PD, ndërsa munguan 7 deputetët për të cilët u kërkua përjashtimi.
Reagimi i Berishës
Pasi dolën nga ambientet e zyrës së Klotilda Bushkës në ambientet e Kuvendit, Berisha është ndalur në një komunikim me gazetarët. Ai tha se kjo që u pa, (ku një grup deputetësh u futën në zyrën e Bushkës dhe nuk lejuan zhvillimin e mbledhjes së sekretariatin e Etikës ku do të shqyrtohej kërkesa për përjashtimin e 7 prej tyre), ishte vetëm fillimi i betejës. “Ne nuk i ndahemi pa rikthimin e të drejtave tona kushtetuese. Në mënyrë absolute nuk do pengojë dot komisionin McGonigal. Është pyetur dy orë në aeroportin e Neë York-ut, ndërsa këtu kërkon që qytetarët të mos marrin vesh asgjë. Do i marrin vësh të gjitha, si është pasuruar… ky ishte një moment i betejës sonë. Por beteja nuk ka të ndalur. Klotilda Bushka mori shkesën dhe iku dhe tha e kam marrë vendimin, i erdhën dhe anëtarët e tjerë dhe shkuan u ndrynë në një zyrë për të firmosur vendimin. Ky është parlamenti shpellë. Ata e marrin vendimin por ne nuk e njohim, nuk njohim vendim të paligjshëm”, tha Berisha jashtë Kuvendit. “Ka shumë skenarë. Nuk mund t’i them, se kjo është betejë nga një grup deputetësh për herë të parë në histori”, shtoi ai.
Reagimi i Korreshit
Deputeti i Partisë Demokratike, Saimir Korreshi ka folur për gazetarët fill pasi doli nga mbledhja e Komisionit të Etikës, i cili mori vendimin për përjashtimin e 7 deputetëve të opozitës, të cilët një ditë më parë penguan punimet e Kuvendit. Korreshi duke ironizuar u shpreh se, nuk i intereson se nuk do të marrin rrogë këtë muaj, ndërsa shtoi më tej se do hanë pensionin e prindërve dhe grosh. “Nuk është procedurë që t’i bjerë bilbilit Klotilda dhe ne të hyjmë në komision. Nuk na intereson fare kjo gjë, punë e madhe se nuk e marrim rrogën këtë muaj. Do hamë pensionin e plakës, do hamë grosh”, tha Korreshi kur u pyet për rrogën, për të cilën rrezikon të mos e marrë për shkak të përjashtimit për disa ditë me radhë.
