Shefja e KE-së ursula von der Leyen i ktheu përgjigje liderit të serbëve në Bosnje, i cili kishte folur për Serbinë e Madhe.
SARAJEVË – Bashkimi Evropian dëshiron që Bosnja dhe Hercegovina të ketë sukses në rrugën e saj të anëtarësimit në BE. Kështu tha presidentja e Komisionit Evropian Ursula von der Leyen në Sarajevë, pas një takimi me kryetaren e Këshillit të Ministrave të vendit, Borjana Kristo.
“E ardhmja e Bosnjës dhe Hercegovinës është në Bashkimin Evropian, si një shtet i vetëm, i bashkuar dhe sovran. Askush nuk e ndan dot Bosnjën. Ne jemi këtu për t’ju mbështetur në afrimin drejt BE-në”, tha Von der Leyen. Kjo deklaratë e der Leyen, vjen si përgjigje ndaj fjalimit të Dodik, që kishte bërë thirrje për krijimin e Serbisë së Madhe.
Shefja e KE-së shtoi se Bosnja duhet të veprojë si një e vetme dhe të mos lejojë pengesa. Von der Leyen nënvizoi nevojën për afrimin e ekonomive të vendeve të Ballkanit Perëndimor me ato të BE-së.
“Ne kemi punuar për të ardhme më të mirë ekonomike për vendet e Ballkanit Perëndimor. Kemi një plan investimi me vlerë 30 miliardë euro për Ballkanin Perëndimor dhe ky plan po sjell me shpejtësi rezultatet e veta. Një shembull i mirë janë projektet e autostradave dhe hekurudhave në vendin tuaj, të cilat janë lidhja e Bosnjës me Evropën Qendrore.
Ekonomia juaj është sa 35% e mesatares evropiane, që do të thotë se ka shumë potencial të pashfrytëzuar, i cili është i rëndësishëm për ne, dhe pikërisht për këtë po prezantojmë planin e ri të zhvillimit për Ballkanin Perëndimor”, tha Von der Leyen, raporton N1.
Gjatë vizitës, Von der Leyen nuk përmendi hapjen e negociatave të anëtarësimit deri në fund të këtij viti. Megjithatë, Borjana Krišto nënvizoi se pret që Bosnja të inkurajohet me hapjen e bisedimeve të pranimit në union.
Kristo tha se kjo vizitë ishte shumë domethënëse për rrugën e Bosnjes drejt BE-së. Ajo shtoi se ata diskutuan se çfarë ka bërë Këshilli i Ministrave në Bosnje e Herzegovinë në dhjetë muajt e fundit, në lidhje me rrugëtimin europian të Bosnjës. Kristo tha se në periudhën e ardhshme, Qeveria në Sarajevë do të punojë intensivisht në përmbushjen e reformave të nevojshme për integrim.
Një incident i vogël ndodhi gjatë kësaj vizite, ku një grup aktivistësh protestuan me pankarta “Von der Leyen dhe BE, fajtore për çfarë po ndodh në Gaza”.
Presidentja e Komisionit Europian nisi një tur ballkanik, ku takoi liderët e vendeve të Ballkanit Perëndimor./I.S
