Kryetari i Partisë Demokratike të Kosovës, Memli Krasniqi tha se kryeministri Albin Kurti e ka bërë pranimin e Asociacionit. Teksa përsëriti, siç i quajti ai, frazat e Kurtit për nënshkrimin e draft-statutit, ai tha se qytetarët nuk mund t’i mashtrojë. Tutje, Krasniqi deklaroi se në takimin e fundit në Bruksel, kryeministri e ka përmbysur komplet karrierën e tij politike.
Në deklarimin e tij ku shefi i ekzekutivit po raporton për takimin e fundit në Bruksel, kreu i PDK-së theksoi se ai nuk është ftuar për t’u shpallur tradhtar, mashtrues e as shpihun. Megjithatë, siç tha Krasniqi, Kurti e ka ndërtuar tërë karrierën e tij me etiketime.
Tutje, i pari i PDK-së theksoi se edhe para ambasadorëve ka raportuar për takimin e fundit në Bruksel, e jo para të zgjedhurve të popullit.
Krasniqi tha se është e rëndësishme të dihet se qysh do e ketë emrin “Asociacioni” në këtë draft.
Kryetari i PDK-së kërkoi detaje se çfarë ka pranuar në Bruksel dhe për çfarë është i gatshëm që të jap.
Në fillim të fjalës së tij, Krasniqi i tha Kurtit “a u qetësove”.
Teksa pati kritika për vonesën e Kurtit në seancë plenare, Krasniqi tha se Kurti i ka kundër të gjithë bashkëpunëtorët e tij të ngushtë të dikurshëm./I.S
