Kreu i Grupit Parlamentar të PD-së, Gazment Bardhi ka dënuar ashpër miratimin në parim të buxhetit të 2024-ës, vetëm me votat e socialistëve.
Ai tha se rrethimi i sallës së Kuvendit me Gardistë, është antikushtetuese dhe e paprecedentë.
“Do të duhet ju t’i kërkoni llogari kryetares së Kuvendit se pse ju gënjeu të shtunën ku mohoi urdhrin e paligjshëm, që mbushi sallën e Kuvendit me gardistë. Shqipëria është anëtare e NATO-s, pret që të anëtarësohet në BE. Sot deputetët kanë qenë të rrethuar nga forcat e sigurisë sikur të ishim vend në gjendje lufte.
E vetmja arsye se pse salla e Kuvendit ishte mbushur me forca të gardës, ishte se në sallë ishte kryeministri Rama. Një frikacak që për të ardhur në seancë blindoi sallën. Nuk kemi përplasje me Gardën. Nuk e kemi betejën me Gardën e Republikës.
Sipas Ligjit Garda nuk mund të futet në seanca për të rrethuar deputetët e Kuvendit.”, tha ai.
Mazhoranca miratoi në një seancë rekord prej vetëm 5 minutash projektligjin e buxhetit si dhe disa projektligje të tjera të përfshira në rendin e ditës./ S.M
