Në dy nga tre rastet, dronët sjellin pajisje shpëtimi aty ku nevojiten para automjeteve me rrota. Sidoqoftë, duhet të ketë dikush në vend që di t’i përdorë ato.
Dronët e ngarkuar me transportin e defibrilatorëve për ringjalljen kardiopulmonare priren të mbërrijnë përpara ambulancave në vendet ku nevojiten. Kjo u demonstrua nga një studim suedez i jetës reale, i cili ngarkoi makineritë fluturuese të dërgonin pajisje shpëtimtare për pacientët që kishin thirrur për ndihmë dhe krahasoi performancën e tyre me atë të ambulancave tradicionale.
ÇFARË JANË AED. Defibrilatorët janë pajisje që zbulojnë ndryshimet në rrahjet e zemrës dhe, kur është e nevojshme, dërgojnë një goditje elektrike në zemrën e pacientit për t’i dhënë fund një aritmie ose arrest kardiak fatal .
Nëse ato përdoren brenda 3-5 minutave pas ngjarjes kardiovaskulare, shanset e pacientit për të mbijetuar mund të jenë deri në 50-70 për qind. Prandaj, defibrilatorët gjysmë automatikë dhe automatikë (të ashtuquajturat AED), të aftë për të analizuar automatikisht sinjalin elektrokardiografik, duhet të jenë të pranishëm në të gjitha vendet publike dhe takimet. Por si t’i transportoni ato atje ku nuk janë, kur është e nevojshme?
GARA KUNDËR KOHËS. Për çdo minutë vonesë në shpëtim pas një arresti kardiak, shanset e pacientit për të mbijetuar reduktohen me 10%. Kjo është arsyeja pse shkencëtarët në Institutin Karolinska në Suedi kanë nisur një projekt, në bashkëpunim me operatorin e dronëve Everdrone dhe shërbimet e urgjencës në Suedinë perëndimore për të krahasuar shpejtësinë e shpëtimit të dronëve me atë të ambulancave.
Për një vit, dronët janë aktivizuar së bashku me ambulancat në përgjigje të thirrjeve për arrest të dyshuar kardiak jashtë spitaleve. Nga 55 raste në të cilat të dy u shfaqën në vend, dronët ishin më të shpejtë se ambulancat në 67% të rasteve, duke mbërritur në një kohë mesatare prej 3 minuta e 14 sekonda.
PËRVEÇ TEKNOLOGJISË, NEVOJITET EDHE PËRGATITJE. Dronët kanë avantazhin se janë në gjendje të dërgojnë defibrilatorë në kushte nga më të ndryshmet, gjatë ditës, natës, dimrit dhe në vende që janë të vështira për t’u arritur nga automjetet me rrota. Por përfitimet e ndërhyrjes së tyre të shpejtë janë të kota nëse nuk ka njeri në vend të aftë të kryejë manovra të ringjalljes kardiopulmonare (dhe të përdorë një defibrilator). Nga 18 herë në të cilat pacienti realisht ka pësuar arrest kardiak, personi që ka aktivizuar shërbimet e urgjencës ka mundur të përdorë defibrilatorin vetëm në 6 raste (dhe për fat është paraqitur edhe ambulanca).
FLUTURONI PËR JETËN TUAJ. Shkencëtarët tani po mendojnë të zgjerojnë testin dhe të përdorin dronët për të paraqitur gjithashtu imazhe video të skenës së shpëtimit tek punonjësit e kujdesit shëndetësor, në mënyrë që ata të mund të japin udhëzime nga distanca; ose përsëri, për t’i përdorur ato për të dhënë epinefrinë në rast të shokut anafilaktik dhe për të ndaluar gjakderdhjen, pajisje të tjera që mund të shpëtojnë jetë.Përshtatur nga fokus.it/O.S
