PISA 2022, studimi më i madh ndërkombëtar për arsimin, ka gjetur se pakënaqësia e 15-vjeçarëve me jetën në Shqipëri, është rritur në 4 vitet e fundit.
Përveç rënies së nivelit arsimor në shkollat shqiptare, anketa globale PISA, gjeti se në vitin 2022 gati 12% e nxënësve në Shqipëri raportuan se nuk ishin të kënaqur me jetën e tyre. Ata e vlerësua kënaqësinë e tyre me jetën me 4 pikë nga 10 gjithsej.
“Sigurisht që për shkak të zhvillimit të vrullshëm ne nuk mund të krahasohemi me 4 vjet më parë, madje as me 1 vit më parë. Kjo sepse të rinjtë përballen me sfida të reja. Ata bombardohen me informacione nga mediat, rrjetet sociale, dhe duke patur shumë llogari, bien pre e bullizmit kibernetik. Ata marrin Kritika dhe sharje që janë të paimagjinueshme shpeshherë për fjalorin dhe gjuhën me urrejtje që përdorin ndaj njëri-tjetrit. Faktor tjetër është që informacionin duan ta marrin shumë të shpejtë, shumë fast-food. Po të shohim informacionin e marrin shumë më thjesht nëse ka foto dhe gërma të mëdha“, shpjegon psikologia shkollore, Dorina Çela.
Një arsye tjetër është që të rinjtë janë të ekspozuar ndaj drogës, duhanit, pijeve energjike që frenojnë zhvillimin e tyre normal. Ajo që duhet bërë është ndërhyrja sa më parë te fuqizimi i trekëndëshit prind-mësues-nxënës. Prindi po kërkon gjithnjë e më shumë notën dhe jo dijen, ndërsa mësuesi kërkon një riprodhim mekanik të njohurive. Fuqizimi i këtij trekëndëshi është zgjidhja./O.S
