Rreth 20 minuta zgjati seanca e sotme plenare, me socialistët që miratuan pa diskutim projektligjet në rendin e ditës, ndërsa opozita vijoi me aksionin për pengimin e zhvillimit normal të jetës parlamentare.
Deputetët socialistë dhe ata të grupit Basha mbërritën në ambientet e Kuvendit rreth 1 orë para, ndoshta për të shmangur në ballafaqim me kolegët demokratë në hyrje të parlamentit. Aty pati më pas momente tensione mes punonjësve të gradës dhe ligjvënësve demokratë të përjashtuar (nga Sekretariati i Etikës me votat e PS). Flamur Noka hodhi miell mbi gardistët dhe Sekretarin e Përgjithshëm të Kuvendit, Genci Gjonçaj. Një veprim ky që sipas Nokës, simbolizon se garda është bërë palë me “narkoparlamentin” dhe “narkoregjimin”.
Një tjetër deputet demokrat zgjodhi të shpaloste një tjetër simbolikë për të shprehur kundërshtinë kundër ligjit të mazhorancës për riligjërimin e lojërave të fatit. Me stampime në veshjen e tij të kartëmonedhave dhe logo të kompanive të basteve, Dashnor Sula tha se me këtë projektligj synohet pastrimi i parave nga politikanët dhe grupet kriminale. Teksa kujtonte deklaratat e kryeministrit Rama që premtonte se “do i jepte fund marrëzisë| kur njoftonte ndalimin e lojërave të fatit, Sula tha për gazetarët në hyrje të Kuvendit se “sot nis dita e çmendurisë”.
/O.S
