Janë arrestuar autorët e plagosjes me armë zjarri, që ndodhi pasditen e sotme në Pogradec.
Mësohet se në pranga ka rënë Denis Meko dhe një Kristo Lotis, të cilët akuzohen se qëlluan me armë zjarri Alted Jolldashin. Mësohet se ndaj Jolldashit është qëlluar katër herë, ndërsa vetëm dy prej plumbave e kanë kapur, një në pjesën e këmbës dhe një tjetër në pjesën e shpatullës.
27-vjeçari i gjakosur ka vrapuar për t’u shpëtuar dy të rinjve, të cilët e ndiqnin nga pas për ta vrarë. Jolldashi ndodhet në spital, teksa momentalisht gjendja e tij është e qëndrueshme.
Policia ka sekuestruar dhe dy armët që autorët përdorën.
Njoftimi i policisë:
Pogradec/Kapet autori i plagosjes me armë, ngjarje e ndodhur pasditen e sotme në qytetin e Pogradecit.
Në pranga, të dy personat e përfshirë në konfliktin me armë.
Sekuestrohen dy armët e zjarrit, të përdorura nga autorët e krimit.
Në vijim të punës për zbardhjen dhe dokumentimin e plotë të ngjarjes së ndodhur ditën e sotme pranë kryqëzimit të Tushemishtit, si dhe falë negociatave të bëra nga shërbimet e Komisariatit të Policisë Pogradec me familjarët e dy autorëve të dyshuar të ngjarjes, u bë e mundur kapja dhe vënia para përgjegjësisë ligjore e tyre. Konkretisht u vunë në pranga shtetasit:
D. M., 32 vjeç dhe K. L., 27 vjeç, banues në Pogradec.
Shtetasit e mësipërm, gjatë një konflikti të çastit, me shtetasin A. J., 27 vjeç, dyshohet se kanë qëlluar me armë zjarri në drejtim të tij, i cili për pasojë mbeti i plagosur dhe ndodhet për mjekim në spital.
Në cilësinë e provës materiale u gjetën dy armët e zjarrit që dyshohet se u përdorën në konflikt, nga autorët e krimit, të cilat u sekuestruan në cilësinë e provës materiale.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme./O.S
