Ministrja e Bujqësisë dhe Zhvillimit Rural Anila Denaj, ka uruar të gjithë shqiptarët për festën e 14 Marsit.
Gjatë vizitës që zhvilloi në panairin e hapur në Bulevardin “Dëshmorët e Kombit” në Tiranë me rastin e Ditës së Verës, Denaj deklaron se cilësia e produkteve shqiptare është rritur dhe në këtë kuadër ajo shprehet se tregjet e krijuara me mbështetjen e qeverisë shqiptare dhe ato ndërkombëtare do të jenë një akses edhe për turistët e huaj.
“Së pari për gjithë shqiptarët gëzuar këtë ditë të bekuar të verës! Ardhtë o mbarë dhe me bereqet! Është një ditë shumë e bukur siç e shikoni edhe vetë plotë me aktivitete, ndërkohë që Ministria e Bujqësisë dhe Zhvillimit Rural përfaqësohet me qendrat e saj, të cilat në gjithë Shqipërinë realizojnë paralelisht produkte bujqësore dhe këtu jemi për t’i tregtuar sikurse edhe për ti bërë më shumë shqiptarët që të blejnë shqip.
Unë jam shumë krenare në fakt që ky ndërgjegjësim është rritur falë edhe cilësisë së produkteve shqiptare, që sot jo vetëm kanë çarë tregjet ndërkombëtare dhe ato cilësore, por po konkurrojnë denjësisht në vendin tonë me produkte, të cilat edhe pse vlera mund të jete pak më e rritur siç na u ankua një konsumator cilësia është ajo që prevalon. Shumë mbarësi të gjithëve të cilët punojnë dhe lidhen në një zinxhir vlerash produktesh dhe ekonomie shkalle.
Për sa i takon aktiviteteve të sotme mendoj që këto janë aktivitete që duhet të zhvillohen përtej Ditës së Verës, sigurisht simbolika vlen, por ne duhet të jemi gjithmonë me konsumatorët, me gjithë fermerët, blegtorët për të mundësuar një shitje në tregjet tona qoftë ato të krijuara me mbështetjen e qeverisë ashtu edhe me partnerët tanë ndërkombëtar që jo pak kanë krijuar tregje në të gjithë Shqipërinë dhe besoj që do jenë akses shumë të mira për turistët e këtij viti që besoj 14 milionëshin e kapim pa frikë”, deklaroi ministrja Denaj./O.S
