Në fund të shekullit, 40-50% e planetit tonë mund të përballet me kushte të reja klimatike të panjohura. Është ky realiteti i krizës klimatike, me pasojat e saj aktuale të valëve të të nxehtit, thatësirave, zjarreve, valëve të ftohta, apo ngjarjeve ekstreme klimatike.
“Future Urban Climates”, një hartë e re interaktive e zhvilluar duke u nisur nga të dhënat e Panelit Ndërqeveritar për Ndryshimet Klimatike (IPCC), organi kryesor shkencor për studimet klimatike, ju lejon të shihni paraprakisht temperaturat dhe bimësinë e dhjetëra mijëra lokaliteteve në botë dhe për të gjetur një vend ku ekzistojnë sot të njëjtat kushte.
Ju mund të kërkoni për qytetin tuaj ose të tjerët që keni interes këtu.
Kështu sipas kësaj harte në vitin 2080, kryeqyteti i Italisë Roma, mund të ketë të njëjtat temperatura si Berati i Shqipërisë. Sipas këtij aplikacioni Tirana do të ketë të njëjta temperatura që ka sot Sordoba në Andaluzi të Spanjës. Milano do të kishte të njëjtat temperatura si Bellinzona në Zvicër, ndërsa Berlini si Emilia Romagna.
Në Romë si në Shqipëri
Ekologë nga Universiteti i Maryland-it në SHBA lidhën 40,581 vende të banuara në planet me vendndodhje të afërta, por më në jug, të cilat tashmë po përjetojnë klimën që ende nuk ka mbërritur diku tjetër. Për shembull ata që jetojnë në Nju Jork duhet të udhëtojnë deri në Misisipin verior për të kuptuar se çfarë klime duhet të presin në 2080, ndërsa banorët e Shangait të Kinës duhet të fillojnë të mësohen me klimën e pranishme tashmë në Pakistanin verior. Kjo është ajo që i pret ata pas 60 vjetësh. Në vitin 2080, sipas skenarit të emetimeve të larta, verat në Romë mund të jenë 5,9°C më të ngrohta. Klima në kryeqytetin italian mund të ngjajë me atë që ndjehet sot në Berat të Shqipërisë.
Ku duhet të shkoj për të marrë një ide për klimën që do të vijë?
“Në 50 vjet, qytetet në veri të hemisferës veriore do të bëhen shumë më të ngjashme me qytetet në jug,” shpjegon Mattheë Fitzpatrick, një nga autorët e veprës. Një ekolog hapësinor, Fitzpatrick përdori një teknikë statistikore që na lejon të lidhim klimën e pritshme në të ardhmen, për shembull, në qytetin tonë të origjinës, me atë që ndjehet aktualisht në një vend tjetër të njohur. Ideja është të ofrojmë një kuptim më të mirë dhe më praktik të ndryshimeve klimatike. Të dhënat e përdorura për hartën janë ato më të fundit nga IPCC dhe bazohen në dy skenarë të ndryshëm klimatikë, njëri me emetime të larta dhe tjetri me emetime të reduktuara.
Drejt një klime ekuatoriale
“Për sa i përket klimës që do të vijë, gjithçka po shkon drejt ekuatorit,” paralajmëron shkencëtari. “Sa më shumë që i afroheni ekuatorit, aq më pak kushte të mira klimatike ka në vende si Amerika Qendrore, Florida jugore dhe Afrika veriore.
Nuk ka asnjë vend në Tokë që përfaqëson atë se si do të duken ato rajone në të ardhmen.”
40% e popullsisë së Tokës, 3.3 miliardë njerëz, jetojnë në rajonet ekuatoriale dhe po përgatiten të jetojnë në kushte klimatike që nuk kanë të barabarta askund në Tokë. Fitzpatrick dhe kolegët shpresojnë se simulimet praktike dhe realiste si këto do të ndihmojnë në nxitjen e një bisede të informuar rreth ndryshimeve klimatike./E.T
