Njeriu në krye të kompanisë që shkaktoi “Black-out”-in më të madh në sistemet IT, në mbarë botën humbi sot gati 250 milionë paund nga pasuria e tij personale, pasi firma e tij pranoi përgjegjësinë për ndërprerjen.
George Kurtz është bashkëthemeluesi dhe CEO i CrowdStrike, firma me bazë në Teksas që fuqizon sigurinë kibernetike për disa nga kompanitë kryesore në botë dhe institucionet financiare globale.
Kompania ka lëshuar një deklaratë faljeje pasi një përditësim i gabuar që iu drejtua klientëve të Windows rrëzoi sistemet e tyre në një ‘pandemi dixhitale’, duke dëmtuar linjat ajrore, aeroportet, transmetuesit, dhe platformat e investimeve.
Gabimi i rëndë fshiu 9 miliardë £ nga vlera e CrowdStrike dhe 320 milion dollarë (247 milion £) nga pasuria personale e Kurtz.
Ai zotëron 5% të aksioneve në firmë dhe rënia përfaqëson një humbje prej një të dhjetës së vlerës së tij neto prej 3.4 miliardë dollarësh.
Crowdstrike raportohet të ketë një pjesë prej 24 për qind të tregut të sigurisë, duke ofruar softuer që mbron kompjuterët e bizneseve nga sulmet e jashtme kibernetike. Kjo do të thotë se qindra miliona kompjuterë ka të ngjarë të jenë prekur nga kjo çështje.
Problemi u shkaktua nga një përditësim sigurie ‘buggy’ për Falcon, një produkt antivirus i shitur nga firma që mbron pajisjet Microsoft Windows nga sulmet kibernetike. S.B
