Gjykata e Posaçme ka vënë nën sekuestro disa pasuri të ish-ministrit të Shëndetësisë, Ilir Beqaj dhe 6 personave të tjerë të dyshuar për abuzime me fondet e Bashkimit Europian. Hetimi pasuror i SPAK, i zhvilluar paralelisht me hetimin penal, që gati 6 javë më parë çoi në qelitë e paraburgimit ish-ministrin, për kohën kur ai drejtonte agjencinë SASPAC, ka konstatuar pasuri që dyshohet të jenë përfituar përmes shkeljes së ligjit.
Sipas vendimi të GJKKO, masa e sekuestros është vendosur mbi afro 20 milionë lekë të rinj, të përbërë nga 14.3 milionë lekë, 15.5 mijë euro dhe 42.3 mijë dollarë amerikanë. Këto shuma parash janë sekuestruar në llogari rrjedhëse, depozitë me afat, cash dhe ju përkasin personave nën hetim Ilir Beqaj, Gazmend Haxhia, Ermal Kurtulaj, Bjona Ziaj dhe Bledar Leka.
Me kërkesë të SPAK gjykata ka ngrirë 19.4 % të kuotave të shoqërisë tregtare “Albanian Food and Hospitality Services”, që është emri tregtari një restoranti pranë qendrës së Tiranës, ku sipas Prokurorisë së Posaçme ka interesa pasurore ish-ministri Beqaj, si edhe tre automjete të regjistruara në pronësi të Ermal Kurtulajt dhe Elton Marinit.
SPAK ka ngritur dyshime se një nga këto mjete, i regjistruar në emër të Kurtulajt, të jetë pasuri e fshehur e Beqajt. Pasuritë e sekuestruara ishin të siguruara nga veprimtaria kriminal, ose vlera të barasvlershme me to.
Në role të ndryshme shtatë të dyshuarit e çështjes po hetohen për “korrupsion”, “fshehje të pasurisë”, “shkelje të barazisë në tendera” dhe “mashtrim”. Ilir Beqaj dhe Ermal Kurtulaj ndodhen në paraburgim, ndërsa të tjerët në masa më të buta sigurie.
Sipas SPAK, ata kanë abuzuar me të paktën 8 procedura tenderuese, duke u dakordësuar për fituesin dhe më pas kryer në mënyrë fiktive procedurën për efekt dokumentacioni, si edhe kanë bërë manovra dokumentare, për të fshehur lidhjet e Beqajt dhe Kurtulajt me restorantin në zonën e Kalasë në kryeqytet
Ndërkohë që ndodhet nën hetim, Beqaj është marrë i pandehur nga SPAK për aferën e Sterilizimit, dosje që ndodhet në fazën e shqyrtimit paraprak. /E.T
