Misioni vazhdon, Kombëtarja shqiptare e futbollit zbret këtë të martë në “folenë e shqiponjave”, në stadiumin “Air Albania”, ku do të përballet me Gjeorgjinë, në raundin e dytë të Ligës së Kombeve.
Kombëtarja po bën përgatitjet e fundit për të ndezur një tjetër festë në zemrat “kuqezi” të të gjithë shqiptarëve ashtu si në fitoren ndaj Ukrainës.
Skuadra e trajnerit Sylvinho ka një provë të vështirë këtë të martë, pasi përballë do të ketë një Gjeorgji, që duket në momentin më të mirë, pasi në Tiranë vjen pas triumfit 4-1 ndaj Republikës Çeke.
Nëse i referohemi historisë së përballjeve mes Shqipërisë dhe Gjeorgjisë, statistikat flasin më mirë për kundërshtarin tonë, pasi në një total prej 13 ndeshjesh, “kuqezinjtë” numërojnë 3 fitore, 7 humbje dhe 3 barazime.
Megjithatë, këto shifra i përkasin së shkuarës, pasi tani më shumë se kurrë Shqipëria ka një skuadër të uritur për fitore dhe që nuk di të ndalet përpara asnjë kundërshtari, cilido qoftë ai.
Shqipëria dhe Gjeorgjia, të dyja kryesojnë Grupin B1 me nga 3 pikë dhe të dyja do të tentojnë të marrin maksimumin nga përballja e kësaj të marte.
Sa i përket Gjeorgjisë, trajneri Sagnol pritet të hedhë në fushë “artilerinë e rëndë” me emra si Mamardashvili në portë dhe Mikautadze e Kvaratskhelia në sulm.
“Kuqezinjtë”, në ndryshim nga kundërshtari do të mbështetet në emra të veçantë si Ismajli, Asllani apo tek Asani, por mbi të gjitha Shqipëria të gjithë shpresën e ka në “dy lojtarë”, e gjithë skuadra dhe te lojtari i 12-të, tifozët që të martën do të “pushtojnë” stadiumin “Air Albania”./e.t
