Kryeministri Edi Rama u takua me anëtarët e rinj të platformës “Deputeti që duam”, ku ju ka kërkuar të kenë duar të pastra në politikë. Ai tha se me figurën e tyre duhet ta ngrejnë vetë besimin tek votuesit, ndërsa la si qëllim që në 2030 të jenë 1 milionë socialistë aktivë.
Kreu i socialistëve Edi Rama ka zhvilluar dje një takim me aplikantët e rinjë të platformës “Deputeti që Duam”. Shefi i qeverisë gjatë takimit tha se deri në vitin 2030 do të synohet të ketë 1 milionë shqiptarë aktivë. Ai tha se PS sot ka 100 mijë anëtarë, votohet nga 700 mijë qytetarë, por ne duhet të jemi partia e 1 mln shqiptarëve aktivë, në një kohë kur do të votojnë edhe shqiptarët e Diasporës. “Sot nuk matemi me ku ishim dhe ku jemi, por ku duhet të jemi në 2030”, tha Rama. Kreu socialist tha se platforma “deputeti që duam” nuk është një rrugë e shkurtër, që nis sot dhe përfundon kur dikush mund të ulet në sallën e Parlamentit. Në këtë kuadër, ai tha se kjo mund të jetë një rrugë e shkurtër për një pakicë apo për disa, por është një rrugë e gjatë për shumicën përderisa sot kemi qindra e qindra aplikantë. Ai ka marrë shembullin e Elisa Spiropalit që katapultoi në PS nga Lëvizja Mjaft. “Elisa Spiropali nuk ka qenë në listën e deputetëve që herën e parë, edhe pse ishte shumë e angazhuar dhe kishte shumë më tepër kohë në angazhimet e PS-së krahasuar me të gjithë ju. Por rritja në eksperiencë, dije, angazhime, bën të vetën, sikundër mund të duhej shumë më tepër kohë për të qenë atje ku është. Politika fatkeqësisht është bërë sinonimi i së keqes, jo vetëm këtu, por në të gjithë botën. Jo se politika nuk bën keq kur bie në duart e së keqes, por politika ka bërë të gjithë gjërat që kanë ndihmuar njeriun për tu organizuar në shoqëri dhe më pas për të organizuar shoqëritë”, tha Rama.
Fushatë për “duar të pastra”
Kryeministri Edi Rama ka kërkuar që njerëzit që do të futen në politikë të jenë me duar të pastra. “Kryeministri tha se sa më shumë duar të pastra dhe njerëz të mirë të angazhohen në politikë, aq më shumë gjëra të mira mund të bëjë politika”, tha Rama. Kryesocialisti Edi Rama foli për platformën Deputeti që Duam, ku po marrin pjesë edhe disa prej aplikantëve. Rama tha se kjo platformë është vendosur në qendër të procesit së PS për zgjedhjet 2025. Rama tha se përmes kësaj platforme do të evidentojnë kandidatura që mund t’i përzgjedhin në listën për deputetë. Por, ata do duhet të angazhohen në rrjete sociale e terren për të promovuar figurën e tyre. “Platforma nuk është një instrument që ne e përdorim për herë të parë. Por për herë të parë ne e kemi vendosur në qendër të një procesi, që ndryshe nga hera e parë fillon thuajse një vit para zgjedhjeve dhe afro 9 muaj përpara se sa të regjistrohen kandidatët për deputetë. Ju jeni nga grupi i parë i aplikantëve që jeni këtu, pro që do të zgjerohet me aplikantë të tjerë të cilët duke filluar nga ju, nuk duhet të presin që pasi u bë aplikimi dhe pasi i dhatë në atë aplikim arsyet tuaja, të ndodhë përzgjedhja. Avantazhi i atyre që vijën më parë, është vetëm koha që kanë më shumë në dispozicion për të treguar se sa janë në gjendje të jenë vlerë e shtuar në skuadrën tonë. S’të bën mosha më e re, s’të bën as fakti që ke dëshirë apo që mund të dish të flasësh bukur, apo as fakti që mund të kesh qenë më parë në rrethin më të gjerë që ka PS. Nuk të bën as lidhja apo lidhjet që mund të kesh me PS. Të gjitha këto janë krejtësisht pamjaftueshme. Vlerë të shtuar të bën çfarë ti je në gjendje të demonstrosh. Duke treguar se je një kandidat apo kandidate që i duhesh skuadrës së PS. Ta demonstrosh këtë cdo ditë”, tha Rama./ S.M
