Ministri i Shtetit për Marrëdhëniet me Parlamentin, Taulant Balla, njëherësh edhe Drejtues Politik i Partisë Socialiste për Diasporën, deklaroi se është arritur një moment historik për diasporën shqiptare, duke i mundësuar atyre të votojnë nga jashtë përmes postës.
Në një intervistë në A2 CNN, ministri Balla, duke folur për rëndësinë e votës së Diasporës, theksoi se është e rëndësishme të ketë një pjesëmarrje sa më të madhe për të festuar këtë moment historik dhe për t’i përfshirë shqiptarët jashtë vendit në vendimmarrjen politike.
“Është ndrequr një gabim historik që u jep mundësinë shqiptarëve jashtë vendit të shprehin vullnetin e tyre politik përmes votës. Shqiptarët kudo që ndodhen, nëse kanë një dokument biometrik të vlefshëm të lëshuar nga Republika e Shqipërisë, do të mund të regjistrohen në një portal të KQZ-së dhe të votojnë përmes postës. Procesi është mjaft transparent, një process sipas standarteve më të mira të të gjitha vendeve dhe një proces i certifikuar në aspektin e sigurisë,” u shpreh ministri Balla.
Sa i përket vizionit të qeverisë shqiptare për Shqipërinë 2030, Balla nënvizoi se kjo nismë është një hap drejt realizimit të synimit për integrimin e Shqipërisë në Bashkimin Evropian.
Lidhur me aktet e fundit të opozitës, ministri Balla u shpreh se këto veprime të dhunshme janë me porosi të Sali Berisha dhe krijojnë një imazh të keq për Shqipërinë në sytë e botës tani që jemi shumë më afër anëtarësimit në BE.
“Në 6 dhjetorin 2022 Shqipëria mirëpriste Samitin e Udhëheqësve të Europës dhe Sali Berisha thërriste protestë. Nuk është e rastësishme që sa herë Shqipëria është para një momenti historik në atë që është rrugëtimi drejt anëtarësimit në BE, Berisha porosit dhunë. Si dje dy javë, ne do të kemi Konferencën e Dytë Ndërqeveritare mes Shqipërisë dhe BE që është moment historik, pas një vendimmarrje të Bashkimit Evropian për të mos penalizuar vendin tonë dhe për ta ndarë nga Maqedonia e Veriut. Ky është një konteksti më i vështiri në 6 vitet e fundit për BE dhe më i miri për Shqipërinë në gjithë këto vite. Opozita ka vendosur që këtë moment historik ta dëmtojë sipas tyre me atë që po ndodh”, theksoi Balla.
Duke sjellë në kujtesë kohën kur Partia Socialiste mbante grevë urie, Balla tha: “PS nuk ka tentuar t’i vërë flakën Parlamentit, ka bërë grevë urie. Kam qëndruar aty 19 ditë dhe kemi bërë një grevë model që nuk bëhet më kurrë, as unë personalisht s’do e bëja dot më sepse kam dalë i sëmurë nga ajo grevë. Metodë model proteste. Jemi në një situatë ku disa rrogtarë të shtetit i vënë flakën karriges që ia keni dhënë ju. Unë jam përjashtuar nga Kuvendi kur i kam thënë Sali Berishës, zotëri je mirë? Ai më fyente mua me libër shpie. Ky që përdorte atë gjuhë harbute nuk dënohej”.
