Ne të gjithë bëjmë gabime në jetë, që nga fëmijëria e deri në moshën e rritur. Por a jemi të gatshëm të mësojmë nga to? Gabimet tona mund të jenë të vogla ose të mëdha, por rëndësi ka se si i përballojmë dhe çfarë mësojmë prej tyre.
Ndoshta jeni duke kaluar një situatë ku ndiheni se keni bërë diçka të gabuar – ndoshta i jeni përgjigjur dikujt me inat në email, keni thënë diçka të dhimbshme një miku ose keni bërë një gabim që duket sikur ka ndryshuar gjithçka. Të gjithë kalojmë nëpër të tilla momente, por ajo që ka rëndësi është si reagojmë ndaj tyre dhe çfarë zgjedhim të bëjmë më pas.
Kur gabimet janë të mëdha
Gabimet e mëdha kanë një peshë të rëndë dhe mund të na përfshijnë emocionalisht për një kohë të gjatë. Ndjenja e fajit dhe pendimi mund të shfaqen menjëherë pas një gabimi, por mënyra se si zgjedhim ta përballojmë atë mund të ndikojë ndjeshëm në jetën tonë. Në raste të tilla, është e rëndësishme të kujtojmë se ashtu si gabimet, edhe përmirësimi është një proces.
Ja disa hapa që mund t’ju ndihmojnë të përballoni gabimet dhe të rigjeni paqen me veten tuaj:
1. Pranoni përgjegjësinë
Kur ndodh një gabim, është e lehtë të përpiqemi t’ia vëmë fajin të tjerëve ose situatave. Por hapi i parë për t’u ndjerë më mirë është të pranoni se ju keni bërë gabimin dhe të pranoni përgjegjësinë tuaj. Kjo tregon maturi dhe hap rrugën për rregullimin e situatës.
2. Mësoni nga gabimi
Gabimet nuk janë vetëm dështime, por mundësi për të mësuar. Çfarë mund të nxirrni nga kjo situatë që do t’ju ndihmojë në të ardhmen? Reflektimi mbi atë që shkoi keq mund të shmangë përsëritjen e së njëjtës sjellje dhe ju bën më të ndërgjegjshëm për vendimet tuaja.
3. Kërkoni falje
Nëse gabimi ka lënduar dikë tjetër, është e rëndësishme të kërkoni falje. Një ndjesë e sinqertë jo vetëm që lehtëson situatën për personin tjetër, por gjithashtu ndihmon që ju të ndiheni më mirë me veten.
4. Jepini vetes kohë për t’u shëruar
Ndjesia e pendimit mund të marrë kohë për t’u përballuar. Mos prisni që ndjenja e fajit të largohet menjëherë. Jepini vetes hapësirë për të reflektuar dhe për të përpunuar atë që ka ndodhur. Ndonjëherë, vetëm koha mund të shërojë disa plagë.
5. Faleni veten
Të falni veten është një nga gjërat më të vështira, por më të rëndësishme që mund të bëni. Të gjithë bëjmë gabime dhe është e rëndësishme ta kujtoni këtë. Mos e mbani veten peng të gabimeve të së shkuarës. Duke pranuar se nuk jeni të përkryer, mund të filloni të ecni përpara dhe të ndiheni më mirë me veten tuaj./E.Ç
