Deputetja Monika Kryemadhi ka reaguar ashpër pas vendimit të gjykatës për masën ‘detyrim paraqitje’. Kryemadhi e konsideron vendimin si një përpjekje për të sabotuar aksionin politik të opozitës dhe për të justifikuar akuza të rreme që, sipas saj, janë ngritur nga individë shpifarakë. Në një deklaratë të gjatë, Kryemadhi u shpreh se aktet e ndalimit dhe procedurat e gjykatës janë të motivuara politikisht, duke akuzuar kryeministrin Edi Rama për përdorimin e sistemit të drejtësisë si një instrument për të eliminuar kundërshtarët politikë. Ajo theksoi se nuk do të ndalet pavarësisht vendimeve të marra kundër saj dhe familjes së saj politike. Kryemadhi gjithashtu iu referua krimeve ekonomike dhe transnacionale që, sipas saj, mbulohen nga qeveria dhe prokurorët që refuzojnë të ndjekin penalisht eksponentët kryesorë të mazhorancës. “Të dashur qytetarë shqiptarë, miq dhe dashamirës të opozitës shqiptare dhe të familjes sonë. Ju falënderoj përzemërsisht për të gjitha mesazhet e solidaritetit gjatë kësaj paradite. Vetëm para pak minutash më është vënë në dispozicion fermani i gjykatës politike të Edi Ramës. Dhjetra faqe me fjali boshe për të justifikuar akuzat e rreme të disa kallëzuesve shpifarakë, atentatorë në tentativë për të vrarë aksionin e opozitës shqiptare në tërësi. Krimet monstruoze transnacionale të Edi Ramës dhe miqve të tij, përdorues të rregullt të SKY dhe EÇ, nuk mund të amnistohen me pamjet e shëmtuara të ndalimit çnjerëzor të ish-Presidentit të Shqipërisë në mes të rrugës. Vjedhjet shtetërore mafioze si ajo e inceneratorëve, që vazhdojnë përditë dhe në çdo sektor, nuk lahen dot me gjyqet publike që mund t’i bëjnë drejtuesve të opozitës shqiptare, përmes proceseve gjyqësore pa prova dhe pa fakte. Krimet e disa prokurorëve të prokurorisë speciale, që nuk guxojnë të përmendin emrat Edi Rama dhe Erion Veliaj, duke i amnistuar dhe duke iu nënshtruar pushtetit, nuk mund të kalohen në heshtje.”, tha ajo. Kryemadhi premtoi se do të ndjekë të gjitha rrugët ligjore për të rrëzuar këtë vendim, duke angazhuar një ekip të fortë mbrojtës në gjykatat vendase dhe ndërkombëtare.