Një person ka humbur jetën dhe rreth 50 të tjerë janë dërguar në spital për shkak të helmimit nga ushqimi në disa restorante McDonald’s në SHBA, sipas njoftimit të Qendrës për Kontrollin dhe Parandalimin e Sëmundjeve (CDC), raporton CNN.
Incidenti, i cili përfshiu dhjetë shtete të ndryshme, është shkaktuar nga infeksioni me bakterin Escherichia coli. Një fëmijë që vuante nga sindroma uremike hemolitike, një komplikacion serioz i këtij infeksioni, është mes të shtruarve në spital. Shumica e rasteve janë raportuar në shtetet Kolorado dhe Nebraska.
Autoritetet janë duke vazhduar hetimet, dhe sipas informacioneve të para, burimi i infeksionit lidhet me përdorimin e qepëve të prera që ishin përdorur në hamburgerë. Për këtë arsye, McDonald’s ka ndërprerë përdorimin e qepëve dhe shitjen e disa produkteve në disa shtete, derisa hetimi të përfundojë. Në një deklaratë zyrtare, kompania njoftoi se qepët e përdorura vinin nga një furnizues i cili shpërndante produkte në tre qendra kryesore të distribucionit. S.B
