Unioni Internacional Demokratik (IDU), një rrjet global me 84 organizata nga 65 vende, kërkon reforma thelbësore për forcimin e demokracisë në Shqipëri, përfshirë ndalimin e persekutimit politik dhe garantimin e një procesi zgjedhor të drejtë e të hapur. Në rezolutën e tij, IDU kritikon ndryshimet kushtetuese të njëanshme dhe dështimin e qeverisë për të adresuar abuzimet elektorale.
Unioni Internacional Demokratik (IDU), një organizatë që përfshin 84 parti dhe lëvizje politike nga 65 vende të botës, ka miratuar një rezolutë unanime për situatën politike në Shqipëri. Në këtë dokument theksohet nevoja për reforma të rëndësishme për forcimin e demokracisë, duke përfshirë ndalimin e persekutimit politik ndaj liderëve të opozitës dhe krijimin e një mjedisi të drejtë për proceset zgjedhore. Rezoluta kritikon qeverinë socialiste të kryeministrit Edi Rama për abuzime elektorale dhe për ndryshime të njëanshme kushtetuese që, sipas saj, kanë dobësuar opozitën. Në të, ngrihet alarmi për persekutimin politik në prag të zgjedhjeve të vitit 2025, i shoqëruar me ndjekje penale dhe burgosje të figurave opozitare si Sali Berisha, Ilir Meta, Fatmir Mediu, Ervin Salianji dhe Fredi Beleri. Në mbledhjen e këtij forumi ndërkombëtar në SHBA, ka marrë pjesë edhe ish-kryetari i Partisë Demokratike, Lulzim Basha, i cili deklaroi se gjatë pranisë së tij nuk është diskutuar apo miratuar një rezolutë e tillë. “Kur kam qenë unë në punime as nuk është diskutuar as miratuar asnjë rezolutë. Se çfarë ka ndodhur në raste të tjera unë nuk e di,” tha Basha. “Duke qenë se pavarësisht rekomandimeve të OSBE/ODIHR, shumica socialiste nën drejtimin e Kryeministrit Rama ka dështuar të adresojë abuzimet elektorale dhe ka ndryshuar në mënyrë të njëanshme kushtetutën për të dobësuar opozitën. Me afrimin e zgjedhjeve të vitit 2025, persekutimi politik po përshkallëzohet, i shoqëruar nga gjyqe të motivuara politikisht, arrestime dhe burgosje të udhëheqësve të opozitës si Prof. Dr. Sali Berisha, Ilir Meta, Fatmir Mediu, Ervin Salianji dhe Fredi Beleri”, thuhet në rezolutën e IDU-së. IDU, ku anëtarë kryesorë janë Partia Republikane Amerikane dhe Konservatorët Britanikë, është një organizatë që promovon vlerat demokratike dhe të qendrës së djathtë globalisht. Rezoluta e fundit për Shqipërinë përfaqëson një qëndrim të fortë në mbështetje të një mjedisi zgjedhor të drejtë dhe lirisë politike.
